సినడల్ శ్రీసభకు పునాది సామాన్య విశ్వాసుల నాయకత్వమే: FABC విశ్వాసుల మరియు కుటుంబ కార్యాలయం

Federation of Asian Bishops' Conferences (FABC) సామాన్య విశ్వాసుల మరియు కుటుంబ కార్యాలయం (Office of Laity and the Family – OLF), జూలై 21న జకార్తాలోని హోటల్ ములియాలో జరిగిన FABC 12వ ప్లీనరీ సమావేశంలో సమర్పించిన తన నివేదికలో, శ్రీసభ సేవలో కుటుంబాలు, మహిళలు, యువత, సామాన్య విశ్వాసుల భాగస్వామ్యాన్ని మరింత బలోపేతం చేయాలని పిలుపునిచ్చింది.

ఆసియాలో శ్రీసభ భవిష్యత్తు కేవలం పీఠాధిపతులు, గురువులు, కన్యస్త్రీలపై మాత్రమే ఆధారపడకుండా, తమ కుటుంబాలు, విచారణలు, సంఘాలలో సువార్తకు సాక్ష్యంగా జీవించే సామాన్య కతోలికుల చురుకైన పాత్రపైనా ఆధారపడి ఉందని ఈ నివేదిక స్పష్టం చేసింది.

బంగ్లాదేశ్‌లోని బరిషాల్ పీఠాధిపతి, కార్యాలయ అధ్యక్షుడు మహా పూజ్య ఇమ్మానుయేల్ కె. రోజారియో, కార్యనిర్వాహక కార్యదర్శి మొమోకో నిషిమురా, SEMD, ఈ నివేదికను సమర్పించారు. కుటుంబాలను బలోపేతం చేయడం, ఖండవ్యాప్తంగా సామాన్య విశ్వాసుల నాయకత్వాన్ని ప్రోత్సహించడం ద్వారా సినడాలిటీని పెంపొందించే పాస్టరల్ కార్యక్రమాలను వారు వివరించారు.

సినడల్ పరివర్తన అనేది నిర్మాణాల ద్వారా కాకుండా, విశ్వాసంలో ప్రజలంతా కలిసి నడవడం ద్వారా ప్రారంభమవుతుందనే సమావేశ ప్రధాన సందేశాన్ని వారి నివేదిక ప్రతిబింబించింది.

దేవుని ప్రజలుగా కుటుంబాలు, మహిళలు, యువత, సామాన్య విశ్వాసులు, ప్రాథమిక శ్రీసభీయ సంఘాలు (Basic Ecclesial Communities – BECs) పరస్పర అనుసంధానమైన విశ్వాస సమాజాలుగా, శ్రీసభ సేవలో ఒక్కొక్కరు తమదైన ప్రత్యేక బాధ్యతను నిర్వర్తించేలా కార్యాలయం తన పాస్టరల్ దృక్పథాన్ని విస్తరించింది.

ప్రధాన కార్యక్రమాల్లో ఒకటి FABC బ్యాంకాక్ డాక్యుమెంట్ 2023 స్ఫూర్తితో రూపొందించిన వైవాహిక జీవితానికి ఆధ్యాత్మిక మార్గాలపై సెమినార్-వర్క్‌షాప్. వివాహానికి ముందు ఇచ్చే శిక్షణతోనే సిద్ధత ముగియకూడదని, వివాహానంతరం కూడా దంపతులకు నిరంతర సహయాత్ర అందించడం ద్వారా వేగంగా మారుతున్న సమాజంలో వారు సువార్తకు శాశ్వత సాక్షులుగా ఎదగాలని ఈ కార్యక్రమం నొక్కిచెబుతోంది.

ప్రస్తుత ఆసియాలో క్రైస్తవ కుటుంబ సేవపై నిర్వహించిన సినడల్ సమావేశాన్ని కూడా కార్యాలయం ఏర్పాటు చేసింది. వలసలు, ఆర్థిక అనిశ్చితి, మారుతున్న సాంస్కృతిక విలువలు, అంతర్మత వాస్తవికతల మధ్య జీవిస్తున్న కుటుంబాల అనుభవాలను ఆలకించాలని స్థానిక శ్రీసభలను ఆహ్వానించింది. పాస్టరల్ సేవను స్వీకరించే వారిగానే కాకుండా, కుటుంబాలు సువార్త ప్రచారంలో క్రియాశీల సేవకులుగా ఎదగాలని ఈ సమావేశం ప్రోత్సహించింది.

ఆసియాలో శ్రీసభ భవిష్యత్తు కేవలం పీఠాధిపతులు, గురువులు, కన్యస్త్రీలతో మాత్రమే పరిమితం కాకుండా, తమ కుటుంబాలు, విచారణలు, సంఘాలలో విశ్వాసంతో జీవించే సామాన్య కతోలికుల సాక్ష్యంపై కూడా ఆధారపడి ఉందని ఈ నివేదిక మరోసారి స్పష్టం చేసింది.

శ్రీసభలో మహిళల పాత్రను బలోపేతం చేయడం కార్యాలయ ప్రాధాన్య కార్యక్రమాల్లో మరొకటి. FABC స్వర్ణోత్సవ వేడుకలు, ఆసియా ఖండ సినడల్ సమావేశంలో వెలువడిన ఆలోచనలను ఆధారంగా చేసుకుని, ఆసియా దేశాల వైవిధ్యభరితమైన సాంస్కృతిక సందర్భాలను గౌరవిస్తూ, శ్రీసభ నాయకత్వం, పాస్టరల్ సేవ, నిర్ణయాత్మక ప్రక్రియల్లో మహిళల భాగస్వామ్యాన్ని మరింత విస్తరించే మార్గాలను కార్యాలయం అన్వేషిస్తోంది.

యువత కూడా కార్యాలయ సేవలో ప్రధాన స్థానాన్ని కొనసాగిస్తోంది. వియత్నాంలోని టాపావోలో నిర్వహించిన FABC యువజన సెమినార్ గురించి నివేదిక ప్రత్యేకంగా ప్రస్తావించింది. శిష్యత్వం, నాయకత్వం, మిషనరీ సాక్ష్యం అంశాలపై దృష్టి సారించిన ఈ కార్యక్రమం, యువ కతోలికులు తమ పాఠశాలలు, కార్యాలయాలు, డిజిటల్ ప్రపంచంలో సువార్తను సాక్ష్యంగా చాటాలని ప్రోత్సహించింది.

కుటుంబ జీవితం మరియు సృష్టి పరిరక్షణ పరస్పర సంబంధం కలిగినవేనని నివేదిక పేర్కొంది. పర్యావరణ బాధ్యత ఇంటి నుంచే ప్రారంభమవుతుందని గుర్తుచేస్తూ, సమగ్ర పర్యావరణ పరిరక్షణపై శ్రీసభ బోధనల స్ఫూర్తితో, సరళ జీవనం, సంఘీభావం, పర్యావరణ పరిరక్షణకు కట్టుబడి ఉండే జీవన విధానాలను కుటుంబాలు అలవరచుకోవాలని కార్యాలయం ప్రోత్సహిస్తోంది.

నివేదిక ముగింపులో, ఆసియాలోని శ్రీసభలు సామాన్య విశ్వాసులను కేవలం సహకారులుగా కాకుండా, శ్రీసభ సేవలో సమాన బాధ్యతలు పంచుకునే భాగస్వాములుగా గుర్తించే విశ్వాస సమాజాల నిర్మాణాన్ని కొనసాగించాలని కార్యాలయం పిలుపునిచ్చింది.

"ఆసియాలో సినడల్ పరివర్తన మరియు వారధులు, వారధుల నిర్మాణకర్తలుగా ఉండే సేవ" అనే అంశంతో కొనసాగుతున్న FABC 12వ ప్లీనరీ సమావేశంలో, శ్రీసభ భవిష్యత్తు కేవలం మేత్రాసనాలు, సంస్థలలోనే కాదు; కుటుంబాలు, ప్రాథమిక శ్రీసభీయ సంఘాలు (BECs), అలాగే ప్రతిరోజూ సువార్తను ఆచరణలో జీవించే విచారణ సంఘాలలో రూపుదిద్దుకుంటుందని ఈ నివేదిక స్పష్టంగా తెలియజేసింది.