ఆర్థిక స్వావలంబన, పర్యావరణ పరిరక్షణకు ప్రాధాన్యమిస్తూ FABCతో భాగస్వామ్యాన్ని విస్తరించనున్న కొలోన్ అగ్ర మేత్రాసనం

ఆసియాలోని శ్రీసభతో తన భాగస్వామ్యాన్ని కేవలం దేవాలయాలు, సేవాపర భవనాల నిర్మాణానికే పరిమితం చేయకుండా, పర్యావరణ పరిరక్షణ, ఆర్థిక స్వావలంబన, రక్షణ విధానాలను (Safeguarding) భవిష్యత్ భాగస్వామ్యాల్లో కీలక అంశాలుగా చేర్చనున్నట్లు జర్మనీలోని కొలోన్ అగ్ర మేత్రాసనం ప్రకటించింది.

ఈ విషయాన్ని జూలై 23న జకార్తాలో జరిగిన Federation of Asian Bishops' Conferences (FABC) 12వ ప్లీనరీ సమావేశంలో ప్రతినిధులను ఉద్దేశించి కొలోన్ అగ్ర మేత్రాసనం విశ్వజనీన శ్రీసభ విభాగం ప్రాజెక్టు సమన్వయకర్త అలెస్సాండ్రో కియెరెగాటో వెల్లడించారు.

తన ప్రసంగం ప్రారంభంలో కొలోన్ అగ్రపీఠాధిపతి కార్డినల్ రైనర్ మారియా వోల్కీ, విశ్వజనీన శ్రీసభ విభాగం డైరెక్టర్ నదీమ్ అమెల్ తరఫున శుభాకాంక్షలు తెలియజేసిన కియెరెగాటో, ఆసియాలోని శ్రీసభ తన భవిష్యత్ దిశను సామూహిక విచక్షణతో నిర్ణయిస్తున్న ఈ సమావేశంలో పాల్గొనడం గొప్ప గౌరవంగా భావిస్తున్నట్లు చెప్పారు.

కొలోన్ అగ్ర మేత్రాసనం విశ్వజనీన శ్రీసభ విభాగం స్థాపనకు 50 సంవత్సరాలు పూర్తవుతున్న సందర్భంగా, 2026 అక్టోబర్ 2 నుంచి 4 వరకు జర్మనీలోని కొలోన్ నగరంలో స్వర్ణోత్సవ వేడుకలు నిర్వహించనున్నట్లు ఆయన తెలిపారు. ఈ వేడుకల్లో పాల్గొనాలని FABC భాగస్వాములను ఆయన ఆహ్వానించారు.

ఆసియాలోని మేత్రాసనాలతో ఐదు దశాబ్దాల సహకారాన్ని స్మరించుకుంటూ, ఇప్పటివరకు దేవాలయాలు, సెమినరీలు, కన్యాస్త్రీల ఆశ్రమాలు, సేవాపర కేంద్రాలు, పీఠాధిపతుల నివాసాల నిర్మాణానికి తమ అగ్ర మేత్రాసనం సహకరించిందని ఆయన చెప్పారు. అయితే నేటి సేవాపర వాస్తవికతలు మరింత విస్తృతమైన సహకార దృక్పథాన్ని కోరుతున్నాయని ఆయన పేర్కొన్నారు.

"గత 50 సంవత్సరాలుగా ఆసియాలోని అనేక మేత్రాసనాల్లో సేవాపర మౌలిక సదుపాయాల అభివృద్ధికి మేము తోడ్పాటునందించాము. ఇప్పుడు మా ఆర్థిక సహాయ మార్గదర్శకాలను పర్యావరణహిత, ఆదాయాన్ని సృష్టించే ప్రాజెక్టులను కూడా చేర్చే విధంగా విస్తరిస్తున్నాము. ఇవి నిర్వహణ వ్యయాలను కూడా తగ్గించడంలో దోహదపడతాయి," అని ఆయన తెలిపారు.

ఈ సవరించిన విధానం ద్వారా స్థానిక శ్రీసభలు ఆర్థికంగా మరింత స్వావలంబన సాధించడంతో పాటు సృష్టి పరిరక్షణకు కూడా అధిక ప్రాధాన్యం ఇవ్వగలవని కియెరెగాటో చెప్పారు. భవిష్యత్ సేవాపర ప్రాజెక్టులు తక్షణ అవసరాలను తీర్చడమే కాకుండా, దీర్ఘకాలిక ఆర్థిక స్థిరత్వాన్ని, పర్యావరణ బాధ్యతను కూడా బలోపేతం చేయాలని ఆయన పేర్కొన్నారు.

అందుకే నిర్వహణ సామర్థ్యాన్ని పెంచే, స్థిరమైన ఆదాయాన్ని సమకూర్చే, పర్యావరణ ప్రభావాన్ని తగ్గించే ప్రాజెక్టులను ప్రోత్సహిస్తూనే, శ్రీసభ సేవాపర కార్యక్రమాలకు తమ సహకారం కొనసాగుతుందని ఆయన తెలిపారు.

ప్రతి భాగస్వామ్యంలో పిల్లలు, బలహీన వర్గాల రక్షణకు సంబంధించిన రక్షణ విధానాలు (Safeguarding) సమర్థంగా అమలవడం కూడా అత్యంత ప్రాధాన్యమని ఆయన అన్నారు.

"సమర్థవంతంగా రూపకల్పన చేసి అమలు చేసే రక్షణ విధానాల పరిధిలో, మా భాగస్వాములు పర్యావరణపరంగా, ఆర్థికపరంగా మరింత స్థిరత్వాన్ని సాధించేలా వారితో కలిసి నడవాలని మేము కోరుకుంటున్నాము," అని ఆయన చెప్పారు.

కొత్త ఆర్థిక సహాయ మార్గదర్శకాల వివరాలను ఈ సమావేశంలో పూర్తిగా వివరించనప్పటికీ, వాటి గురించి మరింత తెలుసుకునేందుకు, చర్చను కొనసాగించేందుకు ఆయన ప్రతినిధులను ఆహ్వానించారు.

కొలోన్ అగ్ర మేత్రాసనం ఆసియాలోని శ్రీసభలతో కొనసాగిస్తున్న దీర్ఘకాలిక భాగస్వామ్యం కొత్త సేవాపర సవాళ్లకు అనుగుణంగా ఎలా రూపాంతరం చెందుతోందో ఆయన ప్రసంగం స్పష్టంగా తెలియజేసింది. మౌలిక సదుపాయాల నిర్మాణంపైనే దృష్టి కేంద్రీకరించకుండా, ఆర్థికంగా స్వావలంబన కలిగిన, పర్యావరణ బాధ్యతతో కూడిన, మానవ గౌరవ పరిరక్షణకు కట్టుబడిన సేవలను బలోపేతం చేయడమే ఈ భాగస్వామ్యం లక్ష్యంగా పెట్టుకుంది.

తన ప్రసంగాన్ని ముగిస్తూ, FABC ప్లీనరీ సమావేశం ఆసియాలోని శ్రీసభకు చిరస్థాయిగా ఫలితాలను అందించాలని కియెరెగాటో ఆకాంక్షించారు. సువార్త ప్రచారం, సేవాపర పునరుద్ధరణలో FABCతో కలిసి నడిచే తన అగ్ర మేత్రాసనం నిబద్ధతను ఆయన మరోసారి పునరుద్ఘాటించారు.

అంతర్జాతీయ శ్రీసభ భాగస్వామ్యాలు ఇప్పుడు పర్యావరణ స్థిరత్వం, బాధ్యతాయుత పరిపాలన, భవిష్యత్ తరాలకు సేవ చేయగల బలమైన స్థానిక శ్రీసభల నిర్మాణాన్ని లక్ష్యంగా చేసుకున్న సినడల్ దృక్పథం ఆధారంగా రూపుదిద్దుకుంటున్నాయనే విషయాన్ని ఆయన ప్రసంగం స్పష్టం చేసింది.