“పేదల్లో క్రీస్తును చూసిన మహనీయుడు - పునీత విన్సెంట్ డి పాల్”
పునీత విన్సెంట్ డి పాల్ గారు పేదల పట్ల దాతృత్వం, కనికరం, సేవాభావానికి ప్రతిరూపంగా గుర్తింపు పొందారు. పేదలు, అనాథలు, రోగులు, నిరాశ్రయులు వంటి అవసరంలో ఉన్నవారిలో మన ప్రభువైన యేసు క్రీస్తును చూస్తూ, వారిని తన సహోదరులుగా భావించారు. వారి జీవితాల్లో ఆశను నింపేందుకు తన జీవితాన్నే అంకితం చేశారు. ఆయన సేవా జీవితం “పేదలకు సేవ చేయడం అంటే క్రీస్తుకే సేవ చేయడం” అనే క్రైస్తవ సందేశానికి సజీవ సాక్ష్యంగా నిలిచింది.
“పునీత విన్సెంట్ డి పాల్ గారి మధ్యవర్తిత్వం ద్వారా పుండ్లతో బాధపడుతున్న ఒక సన్యాసిని, పక్షవాతంతో బాధపడుతున్న ఒక మహిళ స్వస్థత పొందినట్లు శ్రీసభ చరిత్రలో నమోదు చేయబడింది. ఈ అద్భుతాల పరిశీలన అనంతరం ఆయనను 1729లో ధన్యునిగా, 1737లో పునీతునిగా ప్రకటించారు. అయితే ఆయన పవిత్రతకు నిజమైన సాక్ష్యం అద్భుతాలకే పరిమితం కాదు, పేదలలో క్రీస్తును చూసి, వారికి జీవితాంతం సేవ చేసిన ఆయన ప్రేమాభిమానమే ఆయన జీవితానికి గొప్ప సాక్ష్యం.”
పునీత విన్సెంట్ డి పాల్ గారు క్రీ|| శ|| 1660 సెప్టెంబరు 27న శాశ్వతంగా ప్రభుచెంతకు చేరుకున్నారు. వారి పవిత్రశరీరం పారిలోని సెయింట్ లాజరె దేవాలయంలో పదిలపరచబడింది. 13వ బెనడిక్ట్ పోపుగారు 1729లో ధన్యత పట్టానివ్వగా 1737లో 12వ క్లెమెంటు పోపుగారు పునీత పట్టా ప్రకటించారు. 13వ లియో (సింహరాయులు) పోపుగారి ద్వారా దాతృత్వపు సేవలకు అంకితమైన అన్ని సంస్థలు, సంఘాలకు పునీత విన్సెంట్ దె పాల్ గార్ని పాలక పునీతులుగా శ్రీ సభ ఏర్పాటు చేసింది.
సొసైటీ ఆఫ్ సెయింట్ విన్సెంట్ డి పాల్, పేదల సేవకు అంకితం చేయబడిన ఒక కాథలిక్ స్వచ్ఛంద సంస్థ, 1833లో బ్లెస్డ్ ఆంటోయిన్ ఫ్రెడరిక్ ఓజానామ్ గారి చేత ఇది స్థాపించబడింది.
Article and design By m Kranthi Swaroop
