సినడల్ విచక్షణను మరింత ముందుకు తీసుకెళ్లేందుకు 'సంభాషణలు' ప్రారంభించిన FABC ప్లీనరీ సమావేశం

Federation of Asian Bishops' Conferences (FABC) 12వ ప్లీనరీ సమావేశంలో పాల్గొన్న ప్రతినిధులు జూలై 23న సినడల్ విచక్షణలో కొత్త దశలోకి అడుగుపెట్టారు. ఆసియాలోని శ్రీసభ భవిష్యత్ సేవా దిశను రూపుదిద్దేందుకు రూపొందించిన ముఖ్యమైన విధానమైన 'సంభాషణలు' (Table Conversations)లో వారు తొలిసారిగా పాల్గొన్నారు.
గత కొన్ని రోజులుగా ప్రార్థన, శ్రద్ధతో కూడిన ఆలకింపు, ఆధ్యాత్మిక విచక్షణకు ప్రాధాన్యమిచ్చే 'పవిత్రాత్మలో సంవాదం' ప్రక్రియలో పాల్గొన్న కార్డినల్స్, పీఠాధిపతులు, గురువులు, కన్యస్త్రీలు, సామాన్య విశ్వాసుల ప్రతినిధులు, మరింత పరస్పర భాగస్వామ్యంతో కూడిన సంభాషణల కోసం జకార్తాలోని హోటల్ ములియా వాండా హాల్లో సమావేశమయ్యారు.
మధ్యాహ్న సమావేశాన్ని ఫిలిప్పీన్స్‌లోని లింగాయెన్-డగుపాన్ అగ్రపీఠాధిపతి సోక్రటీస్ బి. విల్లెగాస్ ప్రారంభించారు. సినడల్ ప్రయాణంలోని ఈ కొత్త దశను హృదయపూర్వకంగా స్వీకరించాలని ఆయన ప్రతినిధులను ఆహ్వానించారు. చర్చలు ప్రారంభానికి ముందు, పరస్పర సోదరభావాన్ని పెంపొందించేందుకు చిన్న పరిచయ కార్యక్రమంలో పాల్గొనాలని ఆయన వారిని ప్రోత్సహించారు.
ఆ తర్వాత FABC సినడాలిటీ కమిషన్ (CSyd) కార్యనిర్వాహక కార్యదర్శి గురుశ్రీ క్లారెన్స్ దేవదాస్ టేబుల్ సంభాషణల విధానాన్ని వివరించారు. సినడల్ విచక్షణ ప్రక్రియలో ఇది ఒక ముఖ్యమైన ముందడుగని ఆయన పేర్కొన్నారు.
ఈ విధానం 'పవిత్రాత్మలో సంవాదం' స్ఫూర్తిని కొనసాగిస్తూ, శ్రద్ధతో ఆలకించడం, పరస్పర గౌరవం, ప్రార్థనాపూర్వక ఆలోచనలను నిలబెట్టుకుంటూనే, మరింత స్వేచ్ఛాయుత సంభాషణ, ఉమ్మడి విశ్లేషణ, సమిష్టి విచక్షణకు విస్తృత అవకాశాన్ని కల్పిస్తుందని ఆయన వివరించారు.
మునుపటి సమావేశాల్లో ఆధ్యాత్మిక పంచుకోవడం, మౌనం అనే మూడు దశల క్రమబద్ధమైన విధానం అనుసరించగా, టేబుల్ సంభాషణల్లో ఆసియాలోని శ్రీసభ ఎదుర్కొంటున్న అవకాశాలు, సవాళ్లు, వాటికి సేవాపర ప్రతిస్పందనలపై ప్రతినిధులు స్వేచ్ఛగా పరస్పరం చర్చించే అవకాశం కల్పించబడింది.
ఉదయం ప్లీనరీ సమావేశాల్లో వచ్చిన రెండు ప్రధాన ప్రశ్నలపై ప్రతినిధులు తమ ఆలోచనలను పంచుకున్నారు.
మొదటి ప్రశ్నలో, మారుతున్న భౌగోళిక-రాజకీయ పరిస్థితుల్లో, అలాగే విశ్వజనీన శ్రీసభ జీవితంలో, వారధుల నిర్మాణకర్తగా ఎదగడానికి ఆసియాలోని శ్రీసభకు ఉన్న అవకాశాలు, సవాళ్లను పరిశీలించాలని కోరారు.

రెండవ ప్రశ్నలో, స్థానిక శ్రీసభలు మిషనరీ, సినడల్ విశ్వాస సమాజాలుగా మరింత అభివృద్ధి చెందేందుకు సంబంధాలు, శ్రీసభ ప్రక్రియలు, నిర్మాణాల్లో అవసరమైన పరివర్తనపై ప్రతినిధులు చర్చించారు.
ప్రతి చర్చా బృందంలో సంభాషణను నడిపించేందుకు ఒక సమన్వయకర్త, ముఖ్యాంశాలను నమోదు చేసేందుకు ఒక నోట్ రచయిత, బృందం తరఫున నివేదిక సమర్పించేందుకు ఒక ప్రతినిధిని నియమించారు.
గురుశ్రీ దేవదాస్ మాట్లాడుతూ, నాయకత్వం, భాగస్వామ్యం ఒకే వ్యక్తిలో కేంద్రీకృతం కాకుండా సమిష్టిగా ఆచరించబడటం సినడాలిటీ సారాంశమని, ఈ విధానం అదే స్ఫూర్తిని ప్రతిబింబిస్తుందని తెలిపారు.
టేబుల్ సంభాషణల ద్వారా సేకరించిన ఆలోచనలు, ఈ ప్లీనరీ సమావేశం ప్రధాన సేవాపర ఫలితాల్లో ఒకటిగా రూపొందించనున్న ఆచరణాత్మక మార్గదర్శకం (Vademecum) తయారీలో ఉపయోగించబడనున్నాయి. ఆసియాలోని స్థానిక శ్రీసభలు సినడల్ ప్రయాణాన్ని కొనసాగించేందుకు ఈ పత్రం ఆచరణాత్మక మార్గనిర్దేశాన్ని అందించనుంది.
చర్చల అనంతరం ప్రతి బృందం తన ముఖ్యాంశాలను సమావేశానికి సమర్పించింది. దీంతో వివిధ బృందాల్లో వెలువడిన ఆలోచనలను అందరూ పంచుకుని, ఉమ్మడి సినడల్ విచక్షణను మరింత ముందుకు తీసుకెళ్లారు.
వారం రోజుల ప్లీనరీ సమావేశంలో 'సంభాషణలు' ప్రారంభం ఒక ముఖ్యమైన మైలురాయిగా నిలిచింది. 'పవిత్రాత్మలో సంవాదం' ద్వారా పరస్పరం, పవిత్రాత్మ స్వరాన్ని ప్రార్థనాపూర్వకంగా ఆలకించిన ప్రతినిధులు, ఇప్పుడు ఆ ఆలకింపును సమిష్టి ఆలోచనగా, స్పష్టమైన సేవాపర ప్రాధాన్యాలుగా మలచుకునే అవకాశాన్ని ఈ కొత్త విధానం కల్పించింది.
ఆధ్యాత్మిక విచక్షణను క్రమబద్ధమైన సంభాషణతో సమన్వయం చేస్తూ, ఆసియాలోని అవకాశాలు, సవాళ్లకు మరింత సమర్థంగా స్పందించగల శ్రీసభను తీర్చిదిద్దే సినడల్ విధానాన్ని FABC ప్లీనరీ సమావేశం మరోసారి ఆచరణలో చూపించింది.