Federation of Asian Bishops' Conferences (FABC) 12వ ప్లీనరీ సమావేశం చివరి కార్యక్రమం ఒక శ్రీసభలో కాకుండా, జకార్తా నగర వీధుల దిగువన జరిగింది.
జూలై 26న జకార్తా కేథడ్రల్లో ముగింపు దివ్యబలిపూజ అనంతరం, కార్డినల్స్, పీఠాధిపతులు, గురువులు, కన్యస్త్రీలు, సామాన్య విశ్వాసుల ప్రతినిధులు ఫ్రెండ్షిప్ టన్నెల్ గుండా ఇండోనేషియాలోని అతిపెద్ద మసీదైన సమీపంలోని ఇస్తిక్లాల్ మసీదుకు నడుచుకుంటూ వెళ్లారు. ఈ స్వల్ప ప్రయాణం, "సినడల్ పరివర్తన మరియు ఆసియాలో వారధులు, వారధుల నిర్మాణకర్తలుగా ఉండే సేవ" అనే ప్లీనరీ సమావేశ ఇతివృత్తానికి శక్తివంతమైన వ్యక్తీకరణగా నిలిచింది.
జకార్తా కేథడ్రల్ను ఇస్తిక్లాల్ మసీదుతో అనుసంధానించే ఫ్రెండ్షిప్ టన్నెల్, ఇండోనేషియా రాజధాని నడిబొడ్డున ఒకదానికొకటి ఎదురెదురుగా ఉన్న ఈ రెండు ప్రార్థనా మందిరాలను కలుపుతూ, మతాంతర సామరస్యానికి అంతర్జాతీయంగా గుర్తింపు పొందిన ప్రతీకగా నిలిచింది.
అల్-ఫత్తాహ్ గేట్ వద్దకు చేరుకున్న అనంతరం, ప్రతినిధులు తమ చెప్పులను తొలగించి మసీదులోకి ప్రవేశించారు. అక్కడ వారికి ఇండోనేషియా మత వ్యవహారాల మంత్రి, ఇస్తిక్లాల్ మసీదు ప్రధాన ఇమామ్ ప్రొఫెసర్ డాక్టర్ కె.హెచ్. నసారుద్దీన్ ఉమర్ ఘన స్వాగతం పలికారు.
ప్రతినిధి బృందం మసీదులోని ప్రధాన ప్రార్థనా మందిరాన్ని సందర్శించి, దాని చరిత్ర, నిర్మాణ దృక్పథం గురించి తెలుసుకున్నారు. అనంతరం గ్రాండ్ టెర్రస్ను సందర్శించారు. అక్కడ నుంచి మసీదు, కేథడ్రల్ పక్కపక్కనే నిలిచి ఉన్న దృశ్యాన్ని వీక్షించారు. అలాగే ఇండోనేషియా ఇస్లామీయ వారసత్వంలో ఇప్పటికీ ముఖ్యమైన స్థానం కలిగిన సంప్రదాయ వేడుకల డప్పు బెడుగ్ను కూడా పరిశీలించారు.
ఈ సందర్శన, FABC ప్రతినిధులు మరియు ప్రధాన ఇమామ్ మధ్య జరిగిన సంభాషణతో ముగిసింది.
సభను ఉద్దేశించి మాట్లాడిన నసారుద్దీన్ ఉమర్, నిజమైన మత విశ్వాసం ప్రజలను విభజించకుండా, ఇతరులకు సేవ చేయడానికి నడిపించాలని అన్నారు.
"మంచి ముస్లింగా లేదా మంచి కతోలికునిగా ఉండడం అంటే ఇతరులకు మేలు చేయడం," అని ఆయన చెప్పారు.
మానవ గౌరవాన్ని పరిరక్షించడం, శాంతిని ప్రోత్సహించడం, భావి తరాల కోసం మెరుగైన భవిష్యత్తును నిర్మించడం వంటి అంశాల్లో మత సమాజాలు కలిసి పనిచేయాలని ఆయన పిలుపునిచ్చారు. భిన్నత్వం ఘర్షణకు కారణం కాకుండా, పరస్పర సమృద్ధికి అవకాశంగా మారాలని ఆయన పేర్కొన్నారు.
ప్లీనరీ సమావేశానికి పరిశుద్ధ పిత లియో XIV ప్రత్యేక ప్రతినిధిగా హాజరైన కార్డినల్ ఓస్వాల్డ్ గ్రాసియాస్, ఆత్మీయ స్వాగతం పలికిన ప్రధాన ఇమామ్కు కృతజ్ఞతలు తెలియజేస్తూ, ఈ సందర్శన విశాల హృదయం, స్నేహభావం గురించి విలువైన పాఠాన్ని నేర్పిందని అన్నారు.
"మీ ఉదారత, విశాల హృదయం, సేవాభావం నుంచి మేము ఎంతో నేర్చుకున్నాం," అని కార్డినల్ గ్రాసియాస్ అన్నారు.
క్రైస్తవం, ఇస్లాం మతాల ఉమ్మడి ఆధ్యాత్మిక పునాదులను ప్రస్తావిస్తూ, బైబిల్, ఖుర్ఆన్ రెండూ విశ్వాసులను దేవుని వైపు నడిపిస్తూ, శాంతి సాధనాలుగా మారమని పిలుస్తాయని ఆయన చెప్పారు.
"సామరస్యాన్ని నిర్మించడం, మెరుగైన ప్రపంచం కోసం కలిసి పనిచేయడం మన బాధ్యత," అని ఆయన పేర్కొన్నారు.
ఫ్రెండ్షిప్ టన్నెల్ అనేది కేవలం రెండు ప్రార్థనా స్థలాలను కలిపే నిర్మాణం మాత్రమే కాదని కార్డినల్ గ్రాసియాస్ అన్నారు.
"మత నాయకులు కలిసి నడవగలరని, పరస్పరం సహకరించగలరని, మరింత శాంతియుత ప్రపంచ నిర్మాణంలో ఒకరినొకరు బలోపేతం చేసుకోగలరని ఇది సజీవ సాక్ష్యం. ఇదే నేడు మన పిలుపు, మన నిబద్ధత, మన సవాలు," అని ఆయన చెప్పారు.
అనేక మంది ప్రతినిధులకు ఈ సందర్శన, సినడాలిటీపై జరిగిన చర్చలను ఆచరణాత్మక అనుభవంగా మార్చింది. వారం రోజులపాటు ఆలకింపు, సంభాషణ, సంఘబంధం గురించి ధ్యానించిన వారు, రెండు విశ్వాస సమాజాలను కలిపేందుకు నిర్మించిన మార్గంలో నడుస్తూ ప్లీనరీ సమావేశాన్ని ముగించారు.
కేథడ్రల్ నుంచి మసీదు వరకు సాగిన ఈ ప్రతీకాత్మక ప్రయాణం, ప్లీనరీ సమావేశంలోని ప్రధాన సందేశాల్లో ఒకదాన్ని ప్రతిధ్వనింపజేసింది. ఆసియాలో శ్రీసభ ధ్యేయం కేవలం సువార్తను ప్రకటించడం మాత్రమే కాకుండా, మత, సాంస్కృతిక సరిహద్దులను దాటి స్నేహం, సంభాషణ, సహకారాన్ని పెంపొందించడం కూడా అని అది స్పష్టంగా తెలియజేసింది.
ప్రతినిధులు ఆసియా అంతటా తమ తమ మేత్రాసనాలకు తిరిగి వెళ్లేటప్పుడు, వారం రోజుల సమావేశ జ్ఞాపకాలను మాత్రమే కాకుండా మరింత విలువైన అనుభవాన్ని వెంట తీసుకెళ్లారు. ఫ్రెండ్షిప్ టన్నెల్ గుండా చేసిన వారి చివరి ప్రయాణం, సినడాలిటీ అనేది శ్రీసభలో మాత్రమే కాకుండా, ఇతర మతాల పొరుగువారితో పరస్పర గౌరవపూర్వక సాక్షాత్కారం ద్వారా కూడా జీవించబడే జీవన విధానమనే శాశ్వత సందేశాన్ని అందించింది. ఆసియాలోని గొప్ప మత వైవిధ్య సందర్భంలో ఈ సాక్ష్యం మరింత ప్రాముఖ్యతను సంతరించుకుంది.
