పరిపాలనా నివేదికలకే పరిమితం కాకుండా, దేవుని కృప కార్యాల కథలను పంచుకోండి: సినడ్ అధికారి పిలుపు

సినడాలిటీపై సినడ్ అమలు దశలోకి అడుగుపెడుతున్న కతోలిక శ్రీసభలో, స్థానిక శ్రీసభలు కేవలం పరిపాలనా నివేదికలను సిద్ధం చేయడం కాకుండా, తమ విశ్వాస సమాజాల్లో దేవుడు ఎలా కార్యం చేస్తున్నాడో తెలిపే కృపానుభవాల కథలను పంచుకోవాలని పీఠాధిపతుల సినడ్ ప్రధాన కార్యదర్శిత్వానికి సంప్రదింపుదారైన గురుశ్రీ జియాకోమో కోస్టా, SJ పిలుపునిచ్చారు.

జూలై 24న జకార్తాలోని హోటల్ ములియా వాండా హాల్లో జరిగిన Federation of Asian Bishops' Conferences (FABC) 12వ ప్లీనరీ సమావేశంలో ఆయన చేసిన ప్రసంగంలో ఈ అంశం ప్రధాన సందేశాలలో ఒకటిగా నిలిచింది.

ఆసియా నలుమూలల నుంచి వచ్చిన పీఠాధిపతులు, శ్రీసభ నాయకులను ఉద్దేశించి గురుశ్రీ కోస్టా మాట్లాడుతూ, సినడ్ అమలు ప్రక్రియ చివరకు శ్రీసభ జీవన అనుభవాన్ని ప్రార్థనాపూర్వకంగా పరిశీలించే దశకు చేరుకోవాలని, తద్వారా విశ్వాస సమాజాలు తమ మధ్య పవిత్రాత్మ చేస్తున్న కార్యాన్ని గుర్తించగలగాలని చెప్పారు.

మేత్రాసనాలు కార్యక్రమాలు, గణాంకాలపై ఆధారపడిన సాంకేతిక నివేదికలను సిద్ధం చేయడం కంటే, "కథనాత్మక నివేదిక" (Narrative Report) రూపంలో స్థానిక శ్రీసభ జీవితంలో దేవుని కృప ఎలా కార్యం చేసిందో వివరించే ఆధ్యాత్మిక ప్రతిబింబాన్ని రూపొందించాలని ఆయన సూచించారు.

"ముఖ్యమైన ప్రశ్న మనం ఏమి చేశామన్నది కాదు; దేవుడు మన మధ్య ఏమి చేస్తున్నాడన్నదే," అని ఆయన వివరించారు.

ఈ దృక్పథాన్ని వివరించేందుకు గురుశ్రీ కోస్టా పవిత్ర గ్రంథంలోని సంఘటనలను ప్రస్తావించారు. మోషే ప్రభువు తన ముందుగా దాటిపోయిన తరువాత మాత్రమే ఆయనను గుర్తించాడని, ఎమ్మావుకు వెళ్తున్న శిష్యులు తమ ప్రయాణాన్ని వెనుదిరిగి ఆలోచించిన తరువాతనే పునరుత్థాన క్రీస్తును గుర్తించి, తమ హృదయాలు ఎలా ప్రజ్వలించాయో అర్థం చేసుకున్నారని ఆయన చెప్పారు.

ఈ పవిత్ర గ్రంథ సంఘటనలు, ప్రార్థనాపూర్వకంగా గత అనుభవాలను స్మరించుకోవడం ద్వారా విశ్వాసులు దేవుని సన్నిధిని గుర్తిస్తారని తెలియజేస్తాయని ఆయన వివరించారు. సువార్త వెలుగులో తమ ఉమ్మడి అనుభవాలను కలిసి పరిశీలించడం ద్వారా స్థానిక శ్రీసభలు కూడా ఇదే విధంగా ముందుకు సాగాలని సినడ్ అమలు దశ ఆహ్వానిస్తోందని తెలిపారు.

కథనాత్మక నివేదిక అనేది కొద్దిమంది సభ్యులతో కూడిన ఒక కమిటీ అందరి తరఫున సిద్ధం చేసే పత్రం కాదని గురుశ్రీ కోస్టా స్పష్టం చేశారు. అది సామూహిక ఆలకింపు, ప్రార్థన, సంభాషణ, ఆధ్యాత్మిక విచక్షణల ద్వారా ఉద్భవించాల్సినదని అన్నారు.

ఒక విశ్వాస సమాజం కలిసి తన అనుభవాలను పరిశీలించినప్పుడు, సాధారణంగా గుర్తించలేని దేవుని కృప కార్యాలను గుర్తించడం ప్రారంభిస్తుందని ఆయన వివరించారు. పునరుద్ధరించబడిన సంబంధాలు, కొత్త భాగస్వామ్య విధానాలు, శ్రీసభలో మరింత లోతైన విశ్వాసం, పునరుజ్జీవించిన మిషనరీ ఉత్సాహం వంటి అంశాలు సంఖ్యలతో కొలవలేనివైనా, కథల రూపంలో విశ్వసనీయంగా వ్యక్తపరచవచ్చని చెప్పారు.

కథనాలకు ఇచ్చే ఈ ప్రాధాన్యం క్రైస్తవ విశ్వాస స్వభావానికే చెందినదని గురుశ్రీ కోస్టా అన్నారు. శ్రీసభ సిద్ధాంతాలను రూపొందించకముందే, సంస్థాగత నిర్మాణాలను అభివృద్ధి చేయకముందే, యేసుక్రీస్తు జీవితం, మరణం, పునరుత్థానం, తన ప్రజల మధ్య ఆయన నిరంతర సన్నిధి గురించిన కథనే ప్రకటించిందని ఆయన గుర్తుచేశారు.

ఒక విశ్వాస సమాజం కలిసి తన అనుభవాలను పరిశీలించినప్పుడు, సాధారణంగా గుర్తించలేని దేవుని కృప కార్యాలను గుర్తించడం ప్రారంభిస్తుందని ఆయన వివరించారు. పునరుద్ధరించబడిన సంబంధాలు, కొత్త భాగస్వామ్య విధానాలు, శ్రీసభలో మరింత లోతైన విశ్వాసం, పునరుజ్జీవించిన మిషనరీ ఉత్సాహం వంటి అంశాలు సంఖ్యలతో కొలవలేనివైనా, కథల రూపంలో విశ్వసనీయంగా వ్యక్తపరచవచ్చని చెప్పారు.

కథనాలకు ఇచ్చే ఈ ప్రాధాన్యం క్రైస్తవ విశ్వాస స్వభావానికే చెందినదని గురుశ్రీ కోస్టా అన్నారు. శ్రీసభ సిద్ధాంతాలను రూపొందించకముందే, సంస్థాగత నిర్మాణాలను అభివృద్ధి చేయకముందే, యేసుక్రీస్తు జీవితం, మరణం, పునరుత్థానం, తన ప్రజల మధ్య ఆయన నిరంతర సన్నిధి గురించిన కథనే ప్రకటించిందని ఆయన గుర్తుచేశారు.

"దేవుడు చేసిన కార్యాలను వివరించడం ద్వారానే శ్రీసభ ఎప్పుడూ విశ్వాసాన్ని పంచుకుంది," అని ఆయన పేర్కొంటూ, సినడ్ అమలు దశలో స్థానిక శ్రీసభలు కూడా ఆ సంప్రదాయాన్ని తిరిగి సజీవం చేయాలని ప్రోత్సహించారు.

ఆసియాలోని శ్రీసభలకు ఈ ప్రతిపాదన ప్రత్యేక ప్రాధాన్యం కలిగి ఉందని ఆయన అన్నారు. ఖండమంతటా కతోలిక విశ్వాస సమాజాలు విభిన్న సంస్కృతులు, భాషలు, మతాల మధ్య జీవిస్తూ, సంభాషణ, సేవ, సహనశక్తి, సువార్త సాక్ష్యం వంటి ప్రత్యేక అనుభవాలను కలిగి ఉన్నాయని గుర్తుచేశారు.

ఆ అనుభవాలను కథల రూపంలో పంచుకోవడం ద్వారా స్థానిక శ్రీసభలు ఒకదానిని మరొకటి సమృద్ధిగా తీర్చిదిద్దడమే కాకుండా, తమ ప్రత్యేక వరాలను విశ్వజనీన శ్రీసభకు అందించగలవని ఆయన వివరించారు.

సినడ్ అమలు దశలో శ్రీసభకు అత్యంత విలువైన పత్రాలు అధికారిక పత్రాలు కాకపోవచ్చని, విశ్వాసులు ఒకరికొకరు చెప్పుకునే పరివర్తన, సమాధానం, నిరీక్షణ, విశ్వాసపూర్వక పట్టుదల కథలే కావచ్చని ఆయన అన్నారు. ఆ కథల ద్వారా క్రీస్తు తన ప్రజలతో నిరంతరం కలిసి నడుస్తున్నాడనే సత్యం వెల్లడవుతుందని తెలిపారు.

సమాచారం, గణాంకాలు, సామర్థ్యానికి అత్యధిక ప్రాధాన్యం ఇస్తున్న ఈ యుగంలో, దేవుని కృప కార్యాల కథలను సంరక్షించి, వాటిని పంచుకోవడం ద్వారా ప్రతి స్థానిక విశ్వాస సమాజంలో సజీవంగా కార్యం చేస్తున్న క్రీస్తుకు సాక్ష్యమిచ్చే సినడల్ శ్రీసభ దృక్పథాన్ని గురుశ్రీ కోస్టా తన ప్రసంగంలో ప్రతిపాదించారు.