ఆసియాలోని విభజనలు శ్రీసభను గోడలు కాదు, వారధులు నిర్మించమని పిలుస్తున్నాయి – కార్డినల్ డేవిడ్

ఆసియాలో శ్రీసభ సేవ అనేది రక్షణాత్మక గోడల వెనుకకు వెళ్లిపోవడం కాదని, విభజనలతో కూడిన సమాజాల్లో సంభాషణకు వారధులను నిర్మించడమేనని FABC 12వ ప్లీనరీ సమావేశం ప్రారంభ మీడియా సమావేశంలో జూలై 20న కార్డినల్ పాబ్లో వర్జిలియో డేవిడ్ అన్నారు.

ఆసియాలోని అనేక ప్రాంతాల్లో అల్పసంఖ్యాకులుగా జీవిస్తున్న క్రైస్తవ సమాజాలు ఎదుర్కొంటున్న సవాళ్లపై అడిగిన ప్రశ్నకు స్పందిస్తూ, శ్రీసభ అల్పసంఖ్యాక హోదాను ప్రతికూల పరిస్థితిగా కాకుండా, సంభాషణ, సయోధ్య, సోదరభావం ద్వారా సువార్తకు సాక్ష్యమిచ్చే అవకాశంగా చూడాలని కార్డినల్ డేవిడ్ అన్నారు.

ఫిలిప్పీన్స్‌లోని కలోఒకాన్ పీఠాధిపతి, FABC ఉపాధ్యక్షుడు అయిన కార్డినల్ డేవిడ్ మాట్లాడుతూ, "వ్యతిరేకత ఎదురైనప్పుడు మన స్పందన రక్షణ గోడలను నిర్మించడం కాదు. సంభాషణకు వారధులను నిర్మించడమే," అని అన్నారు.

"మనం వారధుల నిర్మాణకర్తలమని చెప్పినప్పుడు, విభజనలు ఉన్నందుకే వారధులు అవసరమవుతాయని అంగీకరిస్తున్నాం. ఆసియాలోని అనేక ప్రాంతాల్లో క్రైస్తవ సమాజాలు చిన్న మందగా జీవిస్తున్నాయి. అక్కడ విభజనలు, ఉద్రిక్తతలు సాధారణ వాస్తవాలుగా ఉన్నాయి," అని ఆయన తెలిపారు.

"సినడల్ పరివర్తనకు పిలుపు – ఆసియాలో వారధులు మరియు వారధుల నిర్మాణకర్తలుగా ఉండే శ్రీసభ సేవ" అనే అంశంతో జూలై 20 నుంచి 26 వరకు జకార్తాలో జరుగుతున్న వారంరోజుల FABC 12వ ప్లీనరీ సమావేశం ప్రధాన అంశాన్నే ఆయన వ్యాఖ్యలు ప్రతిబింబించాయి. ఈ సమావేశంలో FABCకి చెందిన 22 సభ్య పీఠాధిపతుల సమాఖ్యలు, ఇతర శ్రీసభ పరిధుల నుంచి 120 మందికిపైగా కార్డినల్స్, పీఠాధిపతులు పాల్గొంటున్నారు.

ఈ సమావేశ అంశం ఒక ఆదర్శ భావనపై ఆధారపడింది కాదని, ఆసియాలోని వాస్తవ పరిస్థితుల నుంచే రూపుదిద్దుకుందని కార్డినల్ డేవిడ్ అన్నారు. విభిన్న సంస్కృతులు, మతాలు, జాతుల నిలయమైన ఆసియా ఖండం, ఘర్షణలు, పేదరికం, వలసలు, సామాజిక అన్యాయం, పెరుగుతున్న విభజనలు వంటి అనేక సవాళ్లను కూడా ఎదుర్కొంటోందని ఆయన పేర్కొన్నారు.

ఇలాంటి పరిస్థితుల్లో, విభజనలను మరింత పెంచడం కాకుండా, పరస్పర కలయికకు అవకాశాలను సృష్టించేందుకు శ్రీసభ పిలువబడుతోందని ఆయన చెప్పారు.

కార్డినల్ డేవిడ్ అభిప్రాయం ప్రకారం, సంభాషణ అంటే భిన్నతలను తొలగించడం కాదు. భిన్నమైన విశ్వాసాలు, సంస్కృతులు, సంప్రదాయాలు ఉన్నప్పటికీ, ప్రతి వ్యక్తి గౌరవాన్ని గుర్తించి, ఉమ్మడి మేలు కోసం కలిసి ప్రయాణించడం నుంచే నిజమైన సంభాషణ ప్రారంభమవుతుంది.

అల్పసంఖ్యాకులుగా ఉన్న ప్రాంతాల్లో కూడా క్రైస్తవ సమాజాలు మత, సాంస్కృతిక సరిహద్దులను దాటి సయోధ్యను పెంపొందించడంలో, పరస్పర సంబంధాలను బలోపేతం చేయడంలో ప్రత్యేక పాత్ర పోషించగలవని ఆయన నొక్కి చెప్పారు.

జూలై 26 వరకు కొనసాగే FABC 12వ ప్లీనరీ సమావేశంలో ప్రార్థనలు, దివ్యబలిపూజలు, , "కాన్వర్సేషన్స్ ఇన్ ది స్పిరిట్", ప్రాంతీయ సమావేశాలు, సమిష్టి వివేచనలు కొనసాగనున్నాయి. ఆసియా అంతటా సినడాలిటీని ఆచరణలో అమలు చేయడానికి అవసరమైన పాస్టరల్ మార్గదర్శకాలను రూపొందించడంతో పాటు, ఐక్యత, భాగస్వామ్యం, సంభాషణ ద్వారా శ్రీసభ సేవను మరింత బలోపేతం చేయడంపై ప్రతినిధులు చర్చించనున్నారు.

కార్డినల్ డేవిడ్ సందేశం, ఈ సమావేశం ప్రధాన విశ్వాసాల్లో ఒకదాన్ని మరోసారి స్పష్టంచేసింది. ఆసియాలో శ్రీసభ విశ్వసనీయత అనేది సంఖ్యలతో గానీ, ప్రభావంతో గానీ కొలవబడదని, శాంతి, పరస్పర అవగాహన, నిరీక్షణ కోసం వెతుకుతున్న సమాజాల్లో వారధుల నిర్మాణకర్తగా మారేందుకు చూపే సిద్ధతతోనే కొలవబడుతుందని ఆయన పేర్కొన్నారు.