మయన్మార్లో తన సేవలను మరింత విస్తరించుకుంటూ, రేడియో వెరితాస్ ఆసియా పెంతెకొస్తు పండుగ సందర్భంగా మే 24న దేశంలోని అతిపెద్ద నగరం మరియు వాణిజ్య కేంద్రం అయిన యాంగోన్లోని సెయింట్ మేరీస్ కేథడ్రల్లో అఖా మరియు కయాన్ భాషా సేవలను ప్రారంభించింది.
మయన్మార్ కతోలిక పీఠాధిపతుల సమాఖ్య (CBCM) అధ్యక్షుడు మరియు మయన్మార్ RVA భాషా సేవల పరిరక్షకుడు అయిన కార్డినల్ చార్ల్స్ బో, ఈ ప్రారంభోత్సవాన్ని “మయన్మార్ శ్రీసభకు ఆశీర్వాదకరమైన రోజు”గా అభివర్ణించారు.
ఈ కొత్త సేవలు మయన్మార్లోని రెండు జాతి మైనారిటీ సముదాయాలకు సేవలందించేందుకు ఉద్దేశించబడ్డాయి. ప్రస్తుతం మయన్మార్ RVA భాషా సేవలు రోజువారీ సువార్త ధ్యానాలు, ఆదివారం ప్రసంగాలు, చర్చి వార్తలు, యువత మరియు కుటుంబాల కోసం ప్రత్యేక కార్యక్రమాలు, పోప్ సందేశాలు, పర్యావరణ అంశాలు, అంతర్మత సంభాషణలు వంటి ఎనిమిది విభాగాల్లో కార్యక్రమాలను రూపొందిస్తున్నాయి. ప్రతిరోజూ 30 నిమిషాల రేడియో ప్రసారంతో పాటు, ఆంగ్ల భాషలో వార్తా కథనాలు మరియు ప్రేరణాత్మక చిన్న వీడియోలను కూడా అందిస్తున్నాయి.
“ఈ సేవలు అవసరంలో ఉన్న ప్రజలకు దేవుని వాక్యము ద్వారా విశ్వాస సంబంధిత విషయాలు మరియు ఆధ్యాత్మిక ప్రోత్సాహాన్ని అందిస్తాయి” అని కార్డినల్ బో తెలిపారు.
ఈ సేవల ప్రారంభానికి ముందు, మే 11 నుండి 20 వరకు యాంగోన్లోని CBCM కేంద్రంలో అఖా, కయాన్ మీడియా సిబ్బందితో పాటు స్గావ్ కరెన్ మరియు ప్వో కరెన్ సేవల సిబ్బందికి ప్రత్యేక శిక్షణా కార్యక్రమం నిర్వహించారు.
CBCM సామాజిక సమాచార కార్యాలయ అధ్యక్షుడు మహా పూజ్య సెల్సో బా ష్వే, మే 16న శిక్షణ పొందుతున్న వారిని సందర్శించి, సమాజంలోని అట్టడుగు వర్గాలకు సువార్తను తీసుకెళ్లాలని ప్రోత్సహించారు.
మే 18న శిక్షణార్థులను ఉద్దేశించి ప్రసంగించిన కార్డినల్ బో, సువార్త ప్రచారం మరియు సత్యసంధమైన సమాచార ప్రసారం యొక్క ప్రాముఖ్యతను నొక్కిచెప్పారు.
“ప్రతి భాష, ప్రతి జాతి సమూహం సజీవమైనది, విలువైనది. అఖా మరియు కయాన్ భాషలు కుటుంబాలకు, యువతకు, వృద్ధులకు మరియు సమాజానికి సువార్తను చేరవేస్తాయి” అని ఆయన అన్నారు.
మయన్మార్ ప్రస్తుతం ఎదుర్కొంటున్న రాజకీయ, సామాజిక సంక్షోభ సమయంలో RVA వివిధ సముదాయాలను కలుపుతున్న ఒక వంతెనగా పనిచేస్తోందని కూడా ఆయన పేర్కొన్నారు.
“తప్పుడు వార్తల మధ్య, రేడియో వెరితాస్ ప్రజలకు శుభవార్తను అందిస్తోంది” అని కార్డినల్ బో అన్నారు.
అఖా మరియు కయాన్ భాషా సేవల ప్రారంభం, మయన్మార్లో RVA యొక్క బహుభాషా సేవా మిషన్లో తాజా విస్తరణగా నిలిచింది. దేశంలోని విభిన్న జాతి ప్రాంతాల్లో సువార్త ప్రచారం, పాస్టరల్ సేవలు మరియు సమాజ భాగస్వామ్యాన్ని బలోపేతం చేయడంలో చర్చి మీడియా కార్యక్రమాలు నిరంతరం కీలక పాత్ర పోషిస్తున్నాయి.
