అర్జెంటీనాలోని బ్యూనస్ ఎయిర్స్‌లో దేశ పీఠాధిపతులు, సినడల్ బృందాలతో కలిసి సాయంకాల ప్రార్థనలు నిర్వహించిన పోప్ లియో, ప్రజల జీవితాలను మెరుగుపరిచే ప్రతి మంచి కార్యం పట్ల దేవునికి కృతజ్ఞతలు తెలపాలని పిలుపునిచ్చారు.
వివిధ సంస్కృతులు, ప్రాంతాల ప్రజల మధ్య సువార్తను ప్రకటించేందుకు ప్రతి ఒక్కరూ ముందుకు రావాలని, “అందరికీ స్వాగతం.. వెళ్లి సువార్తను ప్రకటించండి” అనే తన పర్యటన నినాదాన్ని గుర్తుచేశారు.
క్రీస్తు అనే మూలరాయి పునాదిగా నిర్మితమైన శ్రీసభలో ఐక్యత, విశ్వాసం, ప్రేమను కాపాడటం పీఠాధిపతుల ప్రధాన బాధ్యతని స్పష్టం చేశారు.
ఐక్యత, శాంతి కోసం కృషిచేసిన అర్జెంటీనా పీఠాధిపతుల ఆదర్శాలను ప్రస్తావిస్తూ, పగలు, ప్రతీకారాలను విడిచిపెట్టి, పరస్పర సంబంధాలను దేవుని కృపతో పునరుద్ధరించుకోవాలని కోరారు.
క్రీస్తును కేంద్రంగా చేసుకొని సేవా కార్యక్రమాలు, క్రైస్తవ ఉపదేశం ద్వారా సువార్తను వ్యాప్తి చేసే పరిచర్యకులను తీర్చిదిద్దాలని సూచించారు.
గురుత్వ, కన్యస్త్రీల దైవపిలుపులను ప్రోత్సహిస్తూ, కుటుంబాలకు తోడ్పడాలని, పేదలు, నిరుద్యోగులు, సరైన నివాస సదుపాయాలు లేనివారు, వలసదారులు, అణగారిన వర్గాల పట్ల ప్రత్యేక శ్రద్ధ చూపాలని పిలుపునిచ్చారు.
ప్రజల జీవితాలను మెరుగుపరిచే నిజాయితీతో కూడిన పని, పేదల సంరక్షణ, సమాజ శ్రేయస్సుకు బాధ్యతాయుతంగా సేవలందించే సంస్థలను ప్రోత్సహించాలని పోప్ లియో కోరారు.
ప్రతి వ్యక్తి గౌరవం, సంపదల సార్వత్రిక వినియోగం, పేదల పట్ల ప్రత్యేక శ్రద్ధ, సృష్టి పరిరక్షణ వంటి విలువలను ఆచరణలో పెట్టేందుకు పరిశుద్ధాత్మ శక్తిని, మరియమాత సహాయాన్ని ఆశ్రయించాలని అర్జెంటీనా పీఠాధిపతులకు సూచించారు.
