ఘనంగా వరప్రసాదమాత పుణ్యక్షేత్ర వార్షిక మహోత్సవం
అలియాబాద్‌లోని వరప్రసాదమాత పుణ్యక్షేత్ర వార్షిక మహోత్సవం ఘనంగా జరిగింది.మిషనరీస్ ఆఫ్ కంపాషన్ సుపీరియర్ జనరల్ ఫాదర్ బోబెన్ గారి ఆధ్వర్యంలో వరప్రసాదమాత పుణ్యక్షేత్ర వార్షిక మహోత్సవ వేడుకలను ఘనంగా నిర్వహించారు. ఈ వేడుకల నిర్వహణలో విచారణ ఫాదర్ ప్రీస్ట్లీ, సహాయ విచారణ గురువు ఫాదర్ బాబు రాజేంద్ర గార్లు తమ పూర్తి సహాయ సహకారాలను అందించారు.
ఈ కార్యక్రమంలో ఏలూరు పీఠాధిపతి, అమృతవాణి మరియు దివ్యవాణి సంస్థల ఛైర్మన్ మహా పూజ్యులు పొలిమేర జయరావు గారు మరియు కటక్ భుబనేశ్వర్ అతిమేత్రాసన సహాయక పీఠాధిపతి మహా పూజ్య రాబిన్ద్ర కుమార్ రాణసింగ్ గారు ముఖ్య అతిథులుగా పాల్గొన్నారు .
నవంబర్ 8 ఆదివారం నాడు ఉదయం 11:15, గంటలకు పండగ పూజను పీఠాధిపతులు ఇతర గురువులతో కలసి సమర్పించారు.అధికసంఖ్యలో గురువులు , సిస్టర్స్ మరియు విశ్వాసులు పాల్గొన్నారు.
మధ్యాహ్నం మరియమాత స్వరూపాన్ని అందంగా అలంకరించిన తేరు పై ఉంచి దేవాలయం చుట్టూ భక్తిశ్రద్ధలతో ప్రదక్షిణ నిర్వహించారు. ఈ సందర్భంగా భక్తులంతా ఎంతో భక్తి ఉత్సాహాలతో పాల్గొని, మరియమాతను దర్శించుకున్నారు. తమ కుటుంబాల శ్రేయస్సు, ఆరోగ్యం, శాంతి సమృద్ధుల కోసం దేవమాతకు ప్రత్యేక ప్రార్థనలు చేసి, తమ విన్నపాలను సమర్పించుకున్నారు. భక్తుల జయజయధ్వానాలతో పుణ్యక్షేత్ర ప్రాంగణం ఆధ్యాత్మిక శోభను సంతరించుకుంది.
Article and Design By M Kranthi Swaroop
