Federation of Asian Bishops' Conferences (FABC) 12వ ప్లీనరీ సమావేశం జకార్తాలో ముగిసింది. ఆసియాలోని కతోలిక శ్రీసభ, సినడాలిటీని శ్రీసభగా జీవించే విధానంగా స్వీకరించి, ఖండవ్యాప్తంగా సహకారం, సంభాషణ, సువార్త ప్రచార సేవ పట్ల తన నిబద్ధతను మరింత బలోపేతం చేయాలని ఈ సమావేశం పునరుద్ఘాటించింది.
"మీరు అంతకంటే గొప్ప సంగతులు చూస్తారు" (యోహాను 1:50): సినడల్ పరివర్తనకు పిలుపు మరియు ఆసియాలో వారధులు, వారధుల నిర్మాణకర్తలుగా ఉండే సేవ అనే ఇతివృత్తంతో, 2026 జూలై 20 నుంచి 26 వరకు వారం రోజులపాటు జరిగిన ఈ సమావేశంలో ఆసియా నలుమూలల నుంచి 120 మందికి పైగా కార్డినళ్లు, పీఠాధిపతులు, గురువులు, కన్యస్త్రీలు, దైవశాస్త్రవేత్తలు, సేవాపర నిపుణులు, సామాన్య విశ్వాసుల ప్రతినిధులు పాల్గొన్నారు.
ప్రతి నాలుగు సంవత్సరాలకు ఒకసారి జరిగే ఈ ప్లీనరీ సమావేశం, పేదరికం, వలసలు, ఘర్షణలు, భౌగోళిక రాజకీయ ఉద్రిక్తతలు, డిజిటల్ పరివర్తన, మతాంతర సంబంధాల సవాళ్లు వంటి ఆసియాలో మారుతున్న వాస్తవికతలపై ప్రతినిధులు లోతుగా ఆత్మపరిశీలన చేసిన కీలక సందర్భంగా నిలిచింది.
కేవలం తీర్మానాలు, ప్రకటనలకే పరిమితమయ్యే సంప్రదాయ సమావేశాలకు భిన్నంగా, జకార్తా ప్లీనరీ సమావేశం ప్రార్థన, ఆధ్యాత్మిక సంభాషణలు, Table Conversationsలను తన కార్యాచరణలో కేంద్రస్థానంలో నిలిపింది. ఆసియాలోని స్థానిక శ్రీసభల జీవన అనుభవాల ద్వారా పరిశుద్ధాత్మ దేవుని సాన్నిధ్యాన్ని గుర్తిస్తూ, పరస్పరం ఆలకించేందుకు ప్రతినిధులను ప్రోత్సహించింది.
ఈ ప్లీనరీ సమావేశం అంతటా ప్రతిధ్వనించిన ప్రధాన సందేశం ఏమిటంటే, సినడాలిటీ అంటే కేవలం కొత్త నిర్మాణాలు లేదా సేవాపర కార్యక్రమాలు కాదు; శ్రీసభ వినడం, తోడుగా నడవడం, సువార్త ప్రచార సేవలో భాగస్వామ్యం కావడం వంటి అంశాలలో లోతైన పరివర్తన అవసరమనే విషయం.
ప్రార్థన, ఆత్మపరిశీలన దినోత్సవం సందర్భంగా కార్డినల్ లూయిస్ ఆంటోనియో టాగ్లే మాట్లాడుతూ, వారధులుగా మారాలనే పిలుపు దేవునికి, మానవాళికి మధ్య వారధియైన క్రీస్తు నుంచే ప్రారంభమవుతుందని గుర్తు చేశారు. విభజనలు, ఘర్షణలతో నిండిన ప్రపంచంలో వారధుల నిర్మాణానికి వినయం, బలహీనతను అంగీకరించడం, త్యాగం అవసరమని ఆయన అన్నారు.
వారధులుగా మారడం అనే ప్లీనరీ సమావేశ ఇతివృత్తం, ప్రతినిధులు జకార్తా బృహద్దేవాలయంను, ఇస్తిక్లాల్ మసీదును అనుసంధానించే ఫ్రెండ్షిప్ టన్నెల్ను సందర్శించినప్పుడు ప్రత్యక్ష రూపం దాల్చింది. ఈ సందర్శన, మతాంతర సహకారంలో ఇండోనేషియా అనుభవాన్ని ప్రతిబింబించడమే కాకుండా, సంభాషణ సౌభ్రాతృత్వానికి, శాంతికి మార్గమవుతుందని చాటిచెప్పింది.
ఆగ్నేయాసియాలోని అతిపెద్ద మసీదు, జకార్తా బృహద్దేవాలయం మధ్యనున్న ఫ్రెండ్షిప్ టన్నెల్, మత సమాజాలు విభజనకు కాకుండా పరస్పర అవగాహన, సహకారాన్ని పెంపొందించాల్సిన అవసరాన్ని ప్రతిబింబించే శక్తివంతమైన ప్రతీకగా నిలిచింది.
సినడాలిటీని ఆసియాలో మరింత బలోపేతం చేయడానికి ఈ ప్లీనరీ సమావేశం పలు ఆచరణాత్మక చర్యలను కూడా ముందుకు తీసుకెళ్లింది. మేత్రాసనాలు, పరిష్లు, శ్రీసభ సమాజాలు తమ దైనందిన జీవితంలో సినడల్ సూత్రాలను ఆచరించేందుకు తోడ్పడే సేవాపర వనరుగా ఉపయోగపడే ఆసియా సినడాలిటీ ఆచరణాత్మక మార్గదర్శకం (Vademecum) రూపకల్పనకు ప్రతినిధులు చట్రాన్ని సిద్ధం చేశారు.
సినడాలిటీలో పీఠాధిపతులు, గురువులు, కన్యస్త్రీలు, సామాన్య విశ్వాసులు ఉమ్మడి బాధ్యతతో భాగస్వాములు కావాలని, ఆలకింపు, భాగస్వామ్యం, సహకారంపై ఆధారపడిన శ్రీసభ సంస్కృతిని పెంపొందించాలని ప్రతినిధులు నొక్కిచెప్పారు.
FABC నియమావళి సవరణలను ఆమోదించడం కూడా ఈ ప్లీనరీ సమావేశం సాధించిన మరో ముఖ్యమైన ఫలితంగా నిలిచింది. సవరించిన నియమావళి సమాఖ్య పాలనను బలోపేతం చేయడం, వివిధ కార్యాలయాల బాధ్యతలను మరింత స్పష్టీకరించడం, ఆసియాలోని పీఠాధిపతుల సమాఖ్యల మధ్య, అలాగే విశ్వజనీన శ్రీసభతో సహకారాన్ని మరింత పెంపొందించడం లక్ష్యంగా రూపొందించబడింది.
వేగంగా అభివృద్ధి చెందుతున్న కృత్రిమ మేధస్సు వంటి కొత్త సవాళ్లపై కూడా ప్లీనరీ సమావేశం దృష్టి సారించింది. ముగింపు విలేకరుల సమావేశంలో శ్రీసభ నాయకులు, సువార్త ప్రచారం, విద్య, ఆరోగ్య సంరక్షణ, సమాచార వినిమయంలో కృత్రిమ మేధస్సు అందించే అవకాశాలను గుర్తిస్తూ, దాని వినియోగంలో నైతిక మార్గదర్శకత్వం అవసరమని నొక్కిచెప్పారు.
సాంకేతికత ఎల్లప్పుడూ మానవ గౌరవానికి సేవ చేయాల్సిందేనని, అది మానవ మనస్సాక్షి, కరుణ, ప్రార్థన, వ్యక్తిగత సంబంధాలకు ప్రత్యామ్నాయంగా మారలేదని వారు హెచ్చరించారు. అలాగే కృత్రిమ మేధస్సు ద్వారా తప్పుడు సమాచారం, మభ్యపెట్టే సమాచార వ్యాప్తి ప్రమాదాలపై ఆందోళన వ్యక్తం చేస్తూ, ముఖ్యంగా యువత బాధ్యతాయుతంగా సాంకేతికతను వినియోగించాలని పిలుపునిచ్చారు.
తుది సందేశంలో FABC, ఆసియాలోని శ్రీసభ నిరీక్షణతో కూడిన సమాజంగా కలిసి నడుస్తూ, విభజనలు పెరుగుతున్న సమాజాల్లో సమరసత, సంభాషణ, సంఘీభావానికి సాక్షులుగా నిలవాలని పిలుపునిచ్చింది.
ఆసియా ఎదుర్కొంటున్న సవాళ్లకు భయంతో లేదా ఒంటరితనంతో స్పందించకుండా, ప్రజల మధ్య వారధులు నిర్మించే క్రీస్తు సేవ పట్ల నూతన నిబద్ధతతో స్థానిక శ్రీసభలు ముందుకు సాగాలని పీఠాధిపతులు పిలుపునిచ్చారు.
జకార్తా నుంచి తమ తమ ప్రాంతాలకు తిరుగు ప్రయాణమైన ప్రతినిధులు కేవలం పత్రాలు, సిఫార్సులనే కాకుండా, సినడాలిటీ జీవన వాస్తవికతగా మారాలి అనే ఉమ్మడి విశ్వాసాన్ని కూడా తమతో తీసుకెళ్లారు. FABC 12వ ప్లీనరీ సమావేశం, ఆసియాలోని శ్రీసభ భవిష్యత్ సేవ కలిసి నడవగలగడం, లోతుగా ఆలకించగలగడం, వేగంగా మారుతున్న ప్రపంచంలో దేవుని ప్రేమకు వారధులుగా మారగల సామర్థ్యంపైనే ఆధారపడి ఉంటుందని స్పష్టంగా ధృవీకరించింది.
