ఆసియాలోని సవాళ్లు, సంభాషణ అనే శ్రీసభ సేవను మరింత బలోపేతం చేస్తున్నాయి – కార్డినల్ ఫెర్రావో

ఆసియాలోని క్రైస్తవ సమాజాలు ఎదుర్కొంటున్న సవాళ్లు శ్రీసభను బలహీనపరచేవి కాదని, సంభాషణ, సయోధ్యల పట్ల నిబద్ధతను మరింత బలపరిచేవని FABC 12వ ప్లీనరీ సమావేశం ప్రారంభ మీడియా సమావేశంలో జూలై 20న కార్డినల్ ఫిలిప్ నేరి ఫెర్రావో అన్నారు.

ఆసియాలోని అనేక దేశాల్లో అల్పసంఖ్యాకులుగా జీవిస్తున్న క్రైస్తవులు ఎదుర్కొంటున్న ఇబ్బందులపై అడిగిన ప్రశ్నకు స్పందిస్తూ, సవాళ్ల మధ్యనే శ్రీసభ తన సేవను ఎల్లప్పుడూ కొనసాగించిందని కార్డినల్ ఫెర్రావో తెలిపారు.

గోవా మరియు దమన్ అగ్రపీఠాధిపతి, FABC అధ్యక్షుడు అయిన కార్డినల్ ఫెర్రావో మాట్లాడుతూ, "తన చరిత్ర అంతటా శ్రీసభ ఎల్లప్పుడూ సవాళ్లతో కూడిన పరిస్థితులను ఎదుర్కొంది. ఆసియాలోని అనేక ప్రాంతాల్లో నేటికీ శ్రీసభ క్లిష్ట పరిస్థితుల మధ్యనే జీవిస్తున్నది," అని అన్నారు.

ఇలాంటి పరిస్థితులకు భయంతో గానీ, ఒంటరితనంతో గానీ స్పందించకుండా, సంబంధాలను బలోపేతం చేయడం, సంభాషణను పెంపొందించడం పట్ల శ్రీసభ స్థిర నిబద్ధతతో ఉండాలని ఆయన పేర్కొన్నారు.

"ఇదే కారణంగా సంబంధాలను నిర్మించడం, సంభాషణను ప్రోత్సహించడం, సయోధ్యను పెంపొందించడం శ్రీసభ బాధ్యతగా మారుతోంది," అని ఆయన అన్నారు.

అసాధారణమైన మత, సాంస్కృతిక, భాషా, జాతి వైవిధ్యంతో కూడిన ఆసియాలో ఈ సేవకు మరింత ప్రాధాన్యం ఉందని కార్డినల్ ఫెర్రావో వివరించారు. ఇలాంటి సందర్భంలో ఇతర మతాలు, సంస్కృతులకు చెందిన ప్రజలతో పాటు, శ్రీసభను అనుమానంతో చూసే వారితో కూడా పరస్పర కలయికకు అవకాశాలను సృష్టించాల్సిన బాధ్యత శ్రీసభపై ఉందని ఆయన చెప్పారు.

"బహిర్ముఖ శ్రీసభగా ఉండాలనే మా నిబద్ధతను మేము మరోసారి పునరుద్ఘాటిస్తున్నాం. మన విశ్వాసాన్ని పంచుకోని వారితోనే కాకుండా, మనలను అనుమానంతో చూసే వారితో కూడా పరస్పర అవగాహనకు వారధులను నిర్మించాలి."

ఆయన వ్యాఖ్యలు "సినడల్ పరివర్తనకు పిలుపు – ఆసియాలో వారధులు మరియు వారధుల నిర్మాణకర్తలుగా ఉండే శ్రీసభ సేవ" అనే FABC 12వ ప్లీనరీ సమావేశం ప్రధాన అంశాన్ని ప్రతిబింబించాయి. జూలై 20 నుంచి 26 వరకు జకార్తాలో జరుగుతున్న ఈ వారంరోజుల సమావేశంలో FABCకి చెందిన 22 సభ్య పీఠాధిపతుల సమాఖ్యలు, ఇతర శ్రీసభ పరిధులకు ప్రాతినిధ్యం వహిస్తున్న 120 మందికిపైగా కార్డినల్స్, పీఠాధిపతులు పాల్గొంటున్నారు.

ఈ ప్రశ్నోత్తర సమావేశంలో ప్రధానంగా ఆసియాలోని అల్పసంఖ్యాక క్రైస్తవ సమాజాలు ఎదుర్కొంటున్న వాస్తవ పరిస్థితులకు శ్రీసభ ఎలా పాస్టరల్‌గా స్పందించాలనే అంశంపై చర్చ జరిగింది. ఈ పరిస్థితులు శ్రీసభను నిరుత్సాహపరచకూడదని, సంభాషణ, పరస్పర అవగాహన, సయోధ్యల ద్వారా సువార్తకు సాక్ష్యమివ్వాలనే తన పిలుపును మరింత బలపరచాలని కార్డినల్ ఫెర్రావో అన్నారు.

ఈ సమావేశం సందర్భంగా ప్రతినిధులు, ప్రార్థనలు, "కాన్వర్సేషన్స్ ఇన్ ది స్పిరిట్", ప్రాంతీయ సమావేశాలు, సమిష్టి వివేచనల ద్వారా ఆసియా అంతటా సినడాలిటీని బలోపేతం చేయడానికి, శ్రీసభ సేవను మరింత సమర్థవంతంగా కొనసాగించడానికి అవసరమైన ఆచరణాత్మక మార్గాలను అన్వేషించనున్నారు.

ఆసియాలో శ్రీసభ విశ్వసనీయత అనేది క్లిష్ట పరిస్థితుల నుంచి దూరంగా ఉండడంపై ఆధారపడదని, ప్రజల మధ్య నిలిచి, పరస్పర అవగాహనను పెంపొందిస్తూ, వైవిధ్యం, విభజనలతో కూడిన సమాజాల్లో నిరీక్షణకు వారధిగా సేవ చేయడంపైనే ఆధారపడి ఉంటుందని కార్డినల్ ఫెర్రావో తెలిపారు.