నవంబర్ 9 అర్జెంటీనాలోని కతోలిక విశ్వవిద్యాలయంలో కార్మిక రంగ ప్రతినిధులతో సమావేశమైన పోప్ లియో , ఆర్థిక లాభం కోసం కాకుండా మానవ గౌరవం, సంక్షేమం కోసం పని ఉండాలని పిలుపునిచ్చారు.
కొద్దిమంది ఆధిపత్యం కొనసాగినప్పుడు కార్మికులు కేవలం వారి పనితీరు, సామర్థ్యం ఆధారంగానే విలువ కట్టబడుతూ, శ్రమ దోపిడీకి గురవుతారని హెచ్చరించారు.
నిరుద్యోగం ఒక వ్యక్తికి ఆదాయాన్ని మాత్రమే కాకుండా, సమాజానికి తన వంతు సేవ చేసే అవకాశాన్ని, ఆత్మగౌరవాన్ని కూడా దూరం చేస్తుందని పేర్కొన్నారు.
ప్రైవేటు ఆస్తి హక్కును శ్రీసభ గుర్తించి సమర్థించినప్పటికీ,భూమి, దాని ఫలాలు సమస్త మానవాళి అవసరాల కోసం దేవుడు ప్రసాదించినవని, వాటిని భావితరాల కోసం కాపాడాలని తెలిపారు.
అలాగే, గృహకార్యాలు, సమాజ సేవ, వ్యవసాయం వంటి ప్రతిఫలం ఆశించకుండా చేసే శ్రమను కూడా గుర్తించి గౌరవించాలని కోరారు.
సమాజ శ్రేయస్సు కోసం ప్రభుత్వాలు కుటుంబాలు, స్థానిక సంస్థలు, సామాజిక సమూహాలను ప్రోత్సహించాలని, కృత్రిమ మేధస్సు, సాంకేతికత వినియోగం నైతిక విలువలకు లోబడి ఉండాలని స్పష్టం చేశారు.
వ్యాపారవేత్తలు తమ పెట్టుబడులతో ఉపాధి కల్పిస్తున్నప్పటికీ, అత్యాశకు లోనుకాకూడదని హెచ్చరిస్తూ,
ఆర్థిక లాభాన్నే విజయానికి ఏకైక ప్రమాణంగా భావించినప్పుడు సంస్థలు మానవత్వాన్ని కోల్పోయి, పాపపు వ్యవస్థలుగా మారతాయని పోప్ లియో పేర్కొన్నారు.
