బిషప్ రాజీనామా!”

“బాధ్యతల భారం.. 66 ఏళ్లకే బిషప్ రాజీనామా!”

జర్మనీలోని స్పెయెర్ డయాసిస్ బిషప్ మహా పూజ్య కార్ల్-హైన్జ్ వీసెమాన్ 66 ఏళ్ల వయసులో తన పదవికి రాజీనామా చేశారు. ఆయన రాజీనామాను పోప్ లియో XIV 2026 ఆగస్టు 19న ఆమోదించారు.

విశ్వాసులకు రాసిన హృదయపూర్వక లేఖలో మహా  పూజ్య  కార్ల్-హైన్జ్ వీసెమాన్ గారు , తన బిషప్ బాధ్యతలు తనపై తీవ్ర ప్రభావాన్ని చూపాయని వెల్లడించారు. సంవత్సరాల తరబడి విస్తృతమైన బాధ్యతలను నిర్వర్తించడం వల్ల తాను శారీరకంగానే కాకుండా, ముఖ్యంగా మానసికంగా కూడా తీవ్ర ఒత్తిడికి గురయ్యానని తెలిపారు.

ముఖ్యంగా, తన మేత్రాసనంలో లైంగిక వేధింపుల కేసులను పరిశీలించడం, వాటి పరిష్కారానికి సంబంధించిన బాధ్యతలను నిర్వహించడం తన మానసిక ఆరోగ్యంపై తీవ్ర ప్రభావం చూపిన  కారణాల్లో ఒకటిగా మారిందని చెప్పారు.
కొంతకాలంగా తాను  డిప్రెసివ్ డిజార్డర్‌తో బాధపడ్డానని, దీనికి వైద్య మరియు మానసిక చికిత్స పొందినట్లు ఆయన వెల్లడించారు.

బిషప్ మహా  పూజ్య వీసెమాన్ గారి కథ మనకు ఒక ముఖ్యమైన సత్యాన్ని గుర్తుచేస్తుంది. మానసిక ఆరోగ్య సమస్యలు ఎవరికైనా ఎదురుకావచ్చు ,  బిషప్‌లు, ఫాదర్ లు,సన్యాసులు కూడా దీనికి అతీతులు కాదు. 

బయటికి వారు విశ్వాసానికి మార్గనిర్దేశం చేసే నాయకులుగా కనిపించినప్పటికీ, వారి వస్త్రాలు, పదవులు, బాధ్యతల వెనుక కూడా భావోద్వేగాలు, బలహీనతలు, బాధలు కలిగిన సాధారణ మానవులే ఉంటారు. నిరంతర సేవ, విపరీతమైన బాధ్యతలు, ఇతరుల బాధలను మోసే పరిస్థితులు కొన్నిసార్లు వారినీ శారీరకంగా, మానసికంగా అలసిపోయేలా చేయవచ్చు.

అందుకే మతగురువుల మానసిక ఆరోగ్యాన్ని కూడా గౌరవించడం, వారి బాధను అర్థం చేసుకోవడం, అవసరమైనప్పుడు వారికి విశ్రాంతి, చికిత్స, ఆధ్యాత్మిక మరియు మానసిక సహాయం అందించడం ఎంతో అవసరం.

బిషప్ వీసెమాన్ గారి స్వస్థత కోసం మనం ప్రార్థిద్దాం. అలాగే తీవ్రమైన ఆధ్యాత్మిక, మానసిక భారాలను మోస్తున్న  ప్రతి బిషప్ ల కొరకు , ప్రతి ఫాదర్ ల కొరకు , ప్రతి సిస్టర్స్ కొరకు , మరియు మానసిక ఆరోగ్య సమస్యలతో పోరాడుతున్న ప్రతి ఒక్కరి కోసం కూడా ప్రార్థిద్దాం.

ప్రభువు వారికి బలాన్ని, శాంతిని, స్వస్థతను ప్రసాదించుగాక. తమ బాధను గుర్తించి, అవసరమైన సహాయాన్ని కోరే ధైర్యాన్ని, కృపను వారికి అనుగ్రహించుగాక.ఆమెన్ !

Article and Design By M Kranthi Swaroop