FABC ప్లీనరీ సమావేశం: ఆసియాలో అవినీతి, తమాచార్యవాదాన్ని అధిగమించాలంటే ‘సినడల్ ఆధ్యాత్మికత’ అవసరం

ఆసియాలో అవినీతి, తమాచార్యవాదం (క్లెరికలిజం) వంటి సవాళ్లను అధిగమించాలంటే సినడాలిటీ స్ఫూర్తిని మరింత బలోపేతం చేయాల్సిన అవసరం ఉందని Federation of Asian Bishops' Conferences (FABC) పేర్కొంది.

ఇండోనేషియాలోని జకార్తాలో జూలై 20న ప్రారంభమైన FABC 12వ ప్లీనరీ సమావేశం సందర్భంగా నిర్వహించిన మీడియా సమావేశంలో, ఆసియాలోని అనేక దేశాల్లో విస్తృతంగా కనిపిస్తున్న ఈ సమస్యలపై మరింత లోతుగా పరిశీలించి, సమిష్టిగా వివేచన చేయనున్నట్లు ఆసియా పీఠాధిపతులు తెలిపారు.

FABC ఉపాధ్యక్షుడు, సినడాలిటీ కమిషన్ అధ్యక్షుడు అయిన ఫిలిప్పీన్స్‌కు చెందిన కార్డినల్ పాబ్లో వర్జిలియో డేవిడ్ మాట్లాడుతూ, శ్రీసభ సేవ ఫలవంతం కావాలంటే గురువులు, సామాన్య విశ్వాసులు సహబాధ్యతతో ముందుకు సాగాలని అన్నారు.

"శ్రీసభ సేవలో సహబాధ్యత... పవిత్రాత్మ ప్రసాదించిన అనేక వరాలు సామాన్య విశ్వాసులు, కన్యస్త్రీలలో కూడా ఉన్నాయని అంగీకరించేలా గురువుల సేవా దృక్పథాన్ని మళ్లీ రూపుదిద్దుతుంది," అని ఆయన చెప్పారు.

ఆసియాకు సంబంధించిన సినడ్ తుది పత్రం ప్రకారం, ఖండంలో సినడాలిటీ లోపించడానికి కారణాల్లో తమాచార్యవాదం కూడా ఒకటి. ముఖ్యంగా అధికార స్థానాల్లో ఉన్నవారిలో కనిపించే ప్రత్యేక హక్కుల భావన దీనికి ప్రధాన కారణమని ఆ పత్రం పేర్కొంది.

బాప్తిస్మం ద్వారా గురువులు, సామాన్య విశ్వాసులు అందరూ ఒకే గౌరవాన్ని పొందారని, గురువులు సామాన్య విశ్వాసుల కంటే "ఉన్నత క్రైస్తవులు" కారని కార్డినల్ డేవిడ్ స్పష్టం చేశారు.

ఇదే సందర్భంగా FABC అధ్యక్షుడు, భారతదేశానికి చెందిన కార్డినల్ ఫిలిప్ నేరి ఫెర్రావో మాట్లాడుతూ, బాప్తిస్మ సంస్కారాన్ని ఆధారంగా చేసుకొని ఐక్యతను పెంపొందించే, భాగస్వామ్య నిర్మాణాలను బలపరిచే కొత్త పాస్టరల్ ప్రణాళికను భారతదేశంలో రూపొందించినట్లు తెలిపారు.

"సినడాలిటీ అనేది కేవలం ఒక వ్యూహం కాదు; అది ఒక విధానశైలి. బాప్తిస్మాన్ని ఆధారంగా చేసుకున్న ఆధ్యాత్మికత. అందులో మనమంతా సమానులమే. అయితే ఈ దిశగా మనమందరం ఇంకా ఎంతో దూరం ప్రయాణించాల్సి ఉంది," అని ఆయన వివరించారు.

ఇదే సందర్భంలో కార్డినల్ డేవిడ్ మాట్లాడుతూ, విశ్వాస జీవితం మరియు సామాజిక బాధ్యత మధ్య స్పష్టమైన అనుసంధానాన్ని ఏర్పరచడం ద్వారా వ్యవస్థాగత అవినీతిని ఎదుర్కోవడం కూడా FABC సేవలో ఒక ముఖ్య భాగమని అన్నారు.

"విశ్వాస ఆచరణకు, సమాజంలో మన ప్రవర్తనకు మధ్య పెద్ద అంతరం ఉంది. ఈ రెండింటి మధ్య బలమైన అనుసంధానాన్ని ఏర్పరచాలి. అదే FABCలో మా నైతిక, ఆధ్యాత్మిక నాయకత్వంలో ఒక ముఖ్యమైన అంశం," అని ఆయన చెప్పారు.

Transparency International విడుదల చేసిన 2025 అవినీతి అవగాహన సూచిక (Corruption Perceptions Index – CPI) ప్రకారం, ఆసియాలో అధిక స్థాయిలో అవినీతి కొనసాగుతూనే ఉందని, గత దశాబ్దంలో దానిని సమర్థవంతంగా నియంత్రించలేకపోయినట్లు వెల్లడైంది.

31 ఆసియా దేశాల్లో 21 దేశాలు ప్రపంచ సగటు 42 CPI స్కోరు కంటే తక్కువ మార్కులు సాధించాయి. వాటిలో భారతదేశం, బంగ్లాదేశ్, ఇండోనేషియా కూడా ఉన్నాయి.

ఈ ఏడాది FABC ప్లీనరీ సమావేశం "సినడల్ పరివర్తనకు పిలుపు – ఆసియాలో వారధులు మరియు వారధుల నిర్మాణకర్తలుగా ఉండే శ్రీసభ సేవ" అనే అంశంతో జరుగుతోంది. వారంరోజుల పాటు సాగే ఈ సమావేశంలో, ప్రపంచంలోనే అత్యంత వైవిధ్యభరితమైన ప్రాంతమైన ఆసియాలో సువార్త ప్రకటనా సేవకు కొత్త మార్గాలను అన్వేషించేందుకు పీఠాధిపతులు వివేచన చేయనున్నారు.

ఆసియాలో సినడాలిటీని ఆచరణలో అమలు చేయడానికి ఉపయోగపడే ఆచరణాత్మక మార్గదర్శకంగా నిలిచే తుది పత్రాన్ని కూడా ఈ సమావేశం అనంతరం విడుదల చేయనున్నట్లు FABC ప్రకటించింది.