Federation of Asian Bishops' Conferences (FABC) జూలై 25న తన **నియమావళి (Statutes)**కి సమగ్ర సవరణలను ఆమోదించింది. ఈ నిర్ణయం సమాఖ్య పాలనా వ్యవస్థను మరింత బలోపేతం చేయడంతో పాటు, ఆసియాలోని శ్రీసభ సినడల్ దృక్పథానికి అనుగుణంగా సంస్థాగత నిర్మాణాలను రూపుదిద్దే కీలక అడుగుగా నిలిచింది.
జకార్తాలో జరిగిన FABC 12వ ప్లీనరీ సమావేశంలో ప్రతినిధుల విస్తృత చర్చలు, ఆధ్యాత్మిక విచక్షణ అనంతరం ఈ సవరించిన నియమావళి ఆమోదించబడింది. అమలులోకి రావడానికి ముందు ఈ సవరించిన పాఠ్యాన్ని ధృవీకరణ కోసం పరిశుద్ధ సింహాసనంకు పంపనున్నారు.
హోటల్ ములియాలోని వాండా హాల్లో జరిగిన ఈ సమావేశాన్ని FABC అధ్యక్షుడు కార్డినల్ ఫిలిప్పే నేరి ఫెర్రావో ప్రారంభించారు. పరిశుద్ధ పిత లియో XIV ప్రత్యేక ప్రతినిధి కార్డినల్ ఓస్వాల్డ్ గ్రాసియాస్, FABC సహాయ ప్రధాన కార్యదర్శి గురుశ్రీ విలియం లారూస్, MM సహకారంతో సవరణలను అధికరణాల వారీగా సమావేశానికి వివరించారు. ఈ సవరణలు సమాఖ్య కేంద్ర కమిటీ ఏడాదికిపైగా నిర్వహించిన సంప్రదింపులు, ముసాయిదా రూపకల్పన ఫలితంగా సిద్ధమయ్యాయి.
ప్రతిపాదనను పరిచయం చేస్తూ కార్డినల్ ఫెర్రావో, ప్రస్తుతం అమలులో ఉన్న నియమావళిని పరిశుద్ధ సింహాసనం 2013లో ఆమోదించిందని గుర్తుచేశారు. అప్పటి నుంచి, ముఖ్యంగా పీఠాధిపతుల సినడ్ అనుభవం ద్వారా FABC సేవాపరంగా, సంస్థాగతంగా గణనీయమైన అభివృద్ధిని సాధించిందని ఆయన పేర్కొన్నారు.
"ఈ సవరించిన నియమావళి, నేటి FABC వాస్తవ పరిస్థితులకు అనుగుణంగా మా పాలనా పత్రాన్ని సమకాలీకరిస్తోంది," అని ఆయన అన్నారు.
కార్డినల్ గ్రాసియాస్ మాట్లాడుతూ, ఈ సవరణలు సమాఖ్య స్వరూపాన్ని మార్చడం కాదని, గత దశాబ్ద కాలంగా క్రమంగా రూపుదిద్దుకున్న అభివృద్ధులను అధికారికంగా గుర్తిస్తున్నాయని వివరించారు.
"మేము మౌలికంగా కొత్తదేదీ ప్రతిపాదించడం లేదు. నేటి FABC వాస్తవ పరిస్థితులను ప్రతిబింబించేలా నియమావళిని నవీకరిస్తున్నాం," అని ఆయన ప్రతినిధులకు తెలిపారు.
ప్రధాన సవరణల్లో ఒకటిగా, FABCను **"ఆసియాలోని శ్రీసభల ఐక్యత, వైవిధ్యాలకు కనిపించే వ్యక్తీకరణ"**గా కొత్తగా నిర్వచించారు. దీనివల్ల సమాఖ్యను కేవలం సమన్వయ సంస్థగా కాకుండా, స్థానిక శ్రీసభల సంఘబంధంగా మరింత స్పష్టంగా ప్రతిపాదించారు.
సవరించిన నియమావళి ప్రకారం, వేదాంతపర, సేవాపర పరిశోధనలను ప్రోత్సహించడం, పీఠాధిపతుల సమాఖ్యల మధ్య సహకారాన్ని బలోపేతం చేయడం, వేటికన్ విభాగాలు మరియు ఇతర ఖండాల పీఠాధిపతుల సమాఖ్యలతో సంబంధాలను విస్తరించడం, అలాగే శ్రీసభ, అంతర్జాతీయ వేదికలపై ఆసియా శ్రీసభకు ప్రాతినిధ్యం వహించడం వంటి అంశాలు కూడా FABC సేవా లక్ష్యంలో స్పష్టంగా చేర్చబడ్డాయి.
ఈ సవరణలు సమాఖ్య పాలనా వ్యవస్థలో కూడా ముఖ్యమైన మార్పులను తీసుకొచ్చాయి. ప్లీనరీ సమావేశమే అత్యున్నత నిర్ణయాధికార సంస్థగా కొనసాగుతుండగా, గతంలోని పదవీధారుల వ్యవస్థ స్థానంలో అధ్యక్షుడు, ఉపాధ్యక్షుడు, ప్రధాన కార్యదర్శితో కూడిన కార్యనిర్వాహక మండలి (Executive Boardను ఏర్పాటు చేశారు.
ఈ కొత్త నిర్మాణం మరింత సహకారపూర్వక నాయకత్వాన్ని ప్రతిబింబిస్తోంది. కేంద్ర కమిటీ నిర్ణయాలను అమలు చేయడం, సమాఖ్య సేవాపర ప్రాధాన్యాలకు మరింత సమర్థవంతంగా స్పందించడం ఈ కార్యనిర్వాహక మండలి బాధ్యతగా ఉంటుంది.
అదేవిధంగా, కేంద్ర కార్యదర్శాలయం పాత్రను కేవలం పరిపాలనా సమన్వయానికి పరిమితం చేయకుండా, సమాచార ప్రసారం, పరిశోధన, సంభాషణ, ఆసియాలోని శ్రీసభల మధ్య సహకారాన్ని ప్రోత్సహించే దిశగా విస్తరించారు. ఉప ప్రధాన కార్యదర్శి, సహాయ ప్రధాన కార్యదర్శుల బాధ్యతలను కూడా సవరించిన నియమావళిలో అధికారికంగా గుర్తించి, సమాఖ్య విస్తరిస్తున్న సేవలకు మరింత సంస్థాగత స్పష్టతను కల్పించారు.
పర్యావరణ పరిరక్షణ పట్ల శ్రీసభ పెరుగుతున్న నిబద్ధతను ప్రతిబింబిస్తూ, సృష్టి సంరక్షణను కూడా FABC సేవా ధ్యేయంలో అంతర్భాగంగా చేర్చారు.
ఇతర క్రైస్తవ శ్రీసభలతో ఉండే ఏకత్వ సంబంధాలు (Ecumenical Relations), ఇతర మతాల అనుచరులతో జరిగే సంభాషణల మధ్య ఉన్న భిన్న స్వభావాన్ని గుర్తిస్తూ వాటిని నియమావళిలో మరింత స్పష్టంగా వేరు చేశారు. గతంలో ఉపయోగించిన ప్రాంతీయ సమావేశం (Regional Assembly) అనే పదానికి బదులుగా, ప్రాంతీయ సహకారం అభివృద్ధి చెందిన విధానాన్ని ప్రతిబింబించేలా "పీఠాధిపతుల ప్రాంతీయ సమూహాలు" అనే మరింత సౌలభ్యమైన భావనను ప్రవేశపెట్టారు.
చర్చల సందర్భంగా ప్రతినిధులు, పరిపాలనా సామర్థ్యం పెరగడం అనేది ఎల్లప్పుడూ సంఘబంధం, జవాబుదారీతనం, ఉమ్మడి ఆధ్యాత్మిక విచక్షణలపై ఆధారపడి ఉండాలని నొక్కిచెప్పారు. రాజ్యాంగపరమైన ప్రధాన నిర్ణయాలకు ఇకముందు కూడా ప్లీనరీ సమావేశం ఆమోదం, పరిశుద్ధ సింహాసనం ధృవీకరణ తప్పనిసరిగా కొనసాగుతాయని తెలిపారు. భవిష్యత్తులో అమలు నిబంధనల ద్వారా ఎలక్ట్రానిక్ ఓటింగ్ను ప్రవేశపెట్టే అవకాశంపై కూడా ప్రతినిధులు చర్చించారు.
సవరించిన నియమావళి ఆమోద ప్రక్రియ కూడా ప్లీనరీ సమావేశం అంతటా ప్రోత్సహించిన సినడల్ విధానాన్నే ప్రతిబింబించింది. పీఠాధిపతులు ప్రతి అధికరణాన్ని చర్చించి, అవసరమైన మార్పులు చేసి, అనంతరం సవరించిన పాఠ్యాన్ని ఆమోదించారు.
పరిశుద్ధ సింహాసనం ధృవీకరణ అనంతరం, ఈ సవరించిన నియమావళి FABCకు సహకారపూర్వక నాయకత్వాన్ని మరింత బలోపేతం చేయడం, సినడల్ పాలనను లోతుగా పెంపొందించడం, అలాగే ఆసియా అంతటా శ్రీసభ సేవను మరింత సమర్థవంతంగా ముందుకు నడిపించడంలో మార్గదర్శకంగా నిలవనుంది.
