ఆర్థిక సహాయం లేదా ఉమ్మడి ప్రాజెక్టుల కంటే, పరస్పరం ఆలకించడం, ఒకరి నుండి ఒకరు నేర్చుకోవడం, విశ్వజనీన శ్రీసభగా కలిసి పయనించాలనే మనోభావంతో ఏర్పడే వ్యక్తిగత అనుబంధాల ద్వారానే అంతర్జాతీయ భాగస్వామ్యాలు బలపడతాయని మిస్సియో మ్యూనిక్ ఆసియా కార్యక్రమాల మేనేజర్ శ్రీమతి బ్రాంకా బెగిచ్ అన్నారు.
జూలై 23న జకార్తాలోని హోటల్ ములియాలో జరుగుతున్న Federation of Asian Bishops' Conferences (FABC) 12వ ప్లీనరీ సమావేశంలో ఆమె ఈ సందేశాన్ని అందించారు.
పరిశుద్ధ పాపు గారి మిషన్ సంఘాల (Pontifical Mission Societies) జర్మనీలోని రెండు విభాగాల్లో ఒకటైన మిస్సియో మ్యూనిక్ తరఫున పాల్గొన్న బ్రాంకా బెగిచ్, దాదాపు మూడు దశాబ్దాలుగా ఆసియా వ్యాప్తంగా శ్రీసభ ప్రాజెక్టులతో కలిసి పనిచేసిన తన అనుభవాన్ని పంచుకున్నారు. FABC ప్లీనరీ సమావేశానికి తొలిసారిగా హాజరవుతున్నప్పటికీ, ఆసియా అంతటా శ్రీసభలో కనిపిస్తున్న సజీవ విశ్వాసాన్ని ఎన్నో సంవత్సరాలుగా తాను ప్రత్యక్షంగా గమనిస్తున్నానని ఆమె తెలిపారు.
"సినడల్ పరివర్తనకు పిలుపు మరియు ఆసియాలో వారధులు, వారధుల నిర్మాణకర్తలుగా ఉండే సేవ" అనే అంశంతో జరుగుతున్న ఈ వారం రోజుల సమావేశంలో ఆసియా నలుమూలల నుంచి కతోలిక నాయకులు సమావేశమైన సందర్భంలో ఆమె ఈ సందేశాన్ని అందించారు.
తన అనుభవాన్ని పంచుకుంటూ, స్థానిక ప్రజలతో సన్నిహిత సంబంధాలు, సంభాషణ పట్ల నిబద్ధత, సజీవమైన సేవాపర జీవితం ద్వారా ఆసియా శ్రీసభ ప్రపంచానికి నిరంతరం స్ఫూర్తినిస్తోందని బ్రాంకా బెగిచ్ అన్నారు.
"అనేక సంవత్సరాలుగా ఆసియాలోని శ్రీసభ వారధులను నిర్మిస్తూ, అర్థవంతమైన సంభాషణను ప్రోత్సహిస్తూ, ఎంతోమంది ప్రజలకు నిజమైన నిరీక్షణను అందిస్తున్న దృశ్యాన్ని మేము చూస్తూనే ఉన్నాము. స్థానిక శ్రీసభల సేవాపర నాయకత్వం, వారి అంకితభావం ద్వారా ఈ 'గొప్ప కార్యాలు' వాస్తవరూపం దాల్చడాన్ని మేము ప్రత్యక్షంగా చూశాము," అని ఆమె చెప్పారు.
మిస్సియో మ్యూనిక్ ఆసియా అంతటా అనేక విజయవంతమైన ప్రాజెక్టులకు సహకరించినప్పటికీ, నిజమైన భాగస్వామ్యం పరిపాలనా సహకారం లేదా ఆర్థిక సహాయాన్ని మించి ఉంటుందని బ్రాంకా బెగిచ్ నొక్కి చెప్పారు.
"మిస్సియో మ్యూనిక్లో మాకు వ్యక్తిగత అనుబంధాలు అత్యంత ముఖ్యమైనవి. మేము కేవలం సంఘీభావాన్ని వ్యక్తం చేయాలనుకోవడం మాత్రమే కాదు; అన్నింటికంటే మిమ్మల్ని ఆలకించాలనుకుంటున్నాము, మీ నుంచి నేర్చుకోవాలనుకుంటున్నాము," అని ఆమె అన్నారు.
విశ్వజనీన శ్రీసభను ఎప్పుడూ దాతలు-గ్రహీతల సంబంధంగా చూడకూడదని ఆమె స్పష్టం చేశారు. ప్రతి స్థానిక శ్రీసభకు తనదైన వరాలు, అనుభవాలు, విశ్వాస సంప్రదాయాలు ఉన్నాయని, అవి విశ్వజనీన కతోలిక సమాజాన్ని మరింత సమృద్ధిగా తీర్చిదిద్దుతాయని ఆమె వివరించారు.
"విశ్వజనీన శ్రీసభలో భాగస్వామ్యం అంటే, క్రీస్తులో సహోదరిసహోదరులుగా ఇరువైపులా ఇవ్వడానికి కూడా, స్వీకరించడానికి కూడా ఉండే సంబంధం," అని ఆమె చెప్పారు.
మిస్సియో మ్యూనిక్ లక్ష్యం ఆసియాలోని సేవాపర కార్యక్రమాలకు సహకరించడం మాత్రమే కాదని, ఆసియా శ్రీసభల అనుభవాలను జర్మనీలోని కతోలికులతో పంచుకోవడము అని బ్రాంకా బెగిచ్ వివరించారు. దీని ద్వారా జర్మనీ కతోలికులు ఆసియాలోని శ్రీసభ జీవంతత్వం, సవాళ్లు, విశ్వాస సాక్ష్యాన్ని మరింత లోతుగా అర్థం చేసుకునే అవకాశం కలుగుతుందని ఆమె అన్నారు.
మిస్సియో మ్యూనిక్ పెద్ద సంస్థ కాకపోయినా, విశ్వాసం మరియు వ్యక్తిగత సంబంధాలపై నిర్మించిన భాగస్వామ్యాలు కేవలం సంస్థాగత నిర్మాణాలపై ఆధారపడిన వాటికంటే ఎక్కువకాలం నిలిచే ఫలితాలను ఇస్తాయని ఆమె పేర్కొన్నారు.
ఆమె ప్రసంగం FABC ప్లీనరీ సమావేశంలో ప్రధానంగా వినిపిస్తున్న సందేశాల్లో ఒకదాన్ని ప్రతిధ్వనించింది. సంభాషణ, భాగస్వామ్యం, పరస్పర గౌరవంతో కూడిన సంబంధాల ద్వారానే సినడాలిటీ ఆచరణలో వ్యక్తమవుతుందని ఆమె వివరించారు.
ఆసియాలో శ్రీసభ తన సినడల్ ప్రయాణాన్ని కొనసాగిస్తున్న ఈ సమయంలో, విభిన్న సంస్కృతులు, ఖండాల మధ్య అనుబంధం, వారధులను నిర్మించే శ్రీసభ సేవను నెరవేర్చడానికి అత్యంత అవసరమని బ్రాంకా బెగిచ్ అన్నారు.
చివరగా, FABC ద్వారా ఏర్పడిన భాగస్వామ్యాలు స్థానిక శ్రీసభలు, అంతర్జాతీయ మిషన్ సంస్థల మధ్య మరింత ఐక్యతను పెంపొందించాలని ఆమె ఆకాంక్షించారు. విశ్వాసాన్ని పంచుకోవడానికి, ఒకరి నుండి ఒకరు నేర్చుకోవడానికి, ఆసియా అంతటా శ్రీసభ ఉమ్మడి సేవను మరింత ముందుకు తీసుకెళ్లడానికి ఇవి కొత్త అవకాశాలను సృష్టిస్తాయని ఆమె విశ్వాసం వ్యక్తం చేశారు.
జర్మనీలోని మ్యూనిక్లో స్థాపించబడిన మిస్సియో మ్యూనిక్, సేవాపర శిక్షణ, సువార్త ప్రచారం, స్థానిక శ్రీసభలతో సంఘీభావం ద్వారా ప్రపంచవ్యాప్తంగా శ్రీసభ మిషన్ సేవకు తోడ్పడుతోంది. జర్మనీలోని పరిశుద్ధ పాపు గారి మిషన్ సంఘాల్లో ఒకటైన ఈ సంస్థ, పరస్పర విశ్వాసం, ఉమ్మడి బాధ్యత, స్థానిక శ్రీసభల నాయకత్వం పట్ల గౌరవం ఆధారంగా భాగస్వామ్యాలను ప్రోత్సహిస్తోంది.
