వంటింటి సేవ నుంచి దేవుని పిలుపు వరకు… ఒడిశా యువతి కన్యస్త్రీ జీవితానికి నడిపించిన దైవ సంకల్పం

వంటింటి సేవ నుంచి దేవుని పిలుపు వరకు… ఒడిశా యువతిని కన్యస్త్రీ జీవితానికి నడిపించిన దైవ సంకల్పం

 జీవితంలో చిన్నదిగా కనిపించే ప్రతి సేవ వెనుక దేవుని గొప్ప ప్రణాళిక దాగి ఉంటుందని మరోసారి నిరూపించిన హృదయస్పర్శి సాక్ష్యం ఇది. తూర్పు భారతదేశంలోని ఒడిశా రాష్ట్రానికి చెందిన ఓ కతోలిక యువతి, మఠంలో వంట సేవ చేయడానికి ఇంటిని విడిచి వెళ్లిన ఆమె, అదే సేవలో దేవుని స్వరాన్ని ఆలకించి కన్యస్త్రీ జీవితాన్ని ఆలింగనం చేసుకుంది.

మదర్ ఆఫ్ కార్మెల్ (CMC) కన్యస్త్రీల సంఘానికి చెందిన సిస్టర్ చంద్రిక ప్రధాన్, ఈ ఏడాది మే 25న కేరళ రాష్ట్రంలో మరో 56 మంది కన్యస్త్రీలతో కలిసి తన శాశ్వత సమర్పణ ప్రతిజ్ఞలను ఆచరించారు. అనంతరం జూన్ 13న ఆమె స్వగ్రామమైన ఒడిశా రాష్ట్రంలోని కంధమాల్ జిల్లా సోమగోటా గ్రామంలో కృతజ్ఞతార్పణ దివ్యబలి సమర్పించబడగా, వందలాది మంది విశ్వాసులు, గురువులు, బంధుమిత్రులు పాల్గొని ఆమె జీవిత సమర్పణను ఆనందోత్సాహాలతో అభినందించారు.

1995 నవంబర్ 16న జోసఫ్ ప్రధాన్, సాల్మినా ప్రధాన్ దంపతులకు జన్మించిన సిస్టర్ చంద్రిక ముగ్గురు సంతానంలో చిన్నది. ఆమె కటక్–భువనేశ్వర్ మేత్రాసన పరిధిలోని కంధమాల్ జిల్లాలో ఉన్న రైకియా ఆవర్ లేడీ ఆఫ్ ఛారిటీ పరిషత్‌కు చెందిన సోమగోటా అనే కతోలిక గ్రామానికి చెందినవారు.

2013లో పదో తరగతి పూర్తిచేసిన అనంతరం, తన ప్రాంతానికి చెందిన మరో యువతితో కలిసి కేరళ రాష్ట్రంలోని ఎర్నాకుళం జిల్లా అంగమాలికి వెళ్లి ఒక మఠంలో వంట సేవలో సహాయం చేయడం ప్రారంభించారు.

ఆ సాధారణ సేవే ఆమె జీవితాన్ని అసాధారణమైన దిశగా మలిచింది.

తన పిలుపును స్మరించుకుంటూ సిస్టర్ చంద్రిక ఇలా అన్నారు:

"మదర్ ఆఫ్ కార్మెల్ సంఘానికి చెందిన మదర్ జయా రోజ్ నన్ను ఎంతో ప్రేమతో ప్రోత్సహించారు. అప్పుడే  దేవుడు నన్ను కన్యస్త్రీ జీవితానికి పిలుస్తున్నాడని క్రమంగా గ్రహించాను. ఈ అమూల్యమైన పిలుపును ప్రసాదించిన ప్రభువుకు నా హృదయపూర్వక కృతజ్ఞతలు."

2019లో ఆమె తొలి సమర్పణ ప్రతిజ్ఞలు చేసి, ఈ సంవత్సరం శాశ్వత ప్రతిజ్ఞల ద్వారా తన జీవితాన్ని పూర్తిగా దేవునికి అంకితం చేసుకున్నారు.

సోమగోటాలో జరిగిన కృతజ్ఞతార్పణ దివ్యబలికి అధ్యక్షత వహించిన గురుశ్రీ మైఖేల్ బెహెరా, సిస్టర్ చంద్రిక జీవిత ప్రయాణాన్ని ప్రతిబింబిస్తూ విశ్వాసులకు ఆధ్యాత్మిక సందేశాన్ని అందించారు.

ఆయన తన సందేశంలో ఇలా పేర్కొన్నారు:

"దేవునికి అసాధ్యమంటూ ఏదీ లేదు. ఆయన సామాన్య జీవితాలను కూడా అసామాన్యమైన సాక్ష్యాలుగా మలచగలడు. చంద్రిక కేరళకు వెళ్లింది వంట సేవ చేయడానికి; కానీ దేవుడు ఆమెను తన ప్రజలకు సేవ చేయడానికి కన్యస్త్రీ జీవితానికి పిలిచాడు. దేవుని ప్రణాళిక మన ఆలోచనలను మించిపోయేంత గొప్పది."

ఇంకా ఆయన మాట్లాడుతూ,వినయంతో చేసే ప్రతి సేవ, దేవుడు సిద్ధం చేసిన పిలుపును కనుగొనే మార్గంగా మారుతుందని, సేవలో నిబద్ధతతో జీవించే హృదయాలను దేవుడు తన ప్రత్యేక కార్యాలకు ఎన్నుకుంటాడని విశ్వాసులను ప్రోత్సహించారు.

సిస్టర్ చంద్రిక జీవితగాథ, చిన్న సేవను కూడా దేవునికి అర్పించినప్పుడు అది పవిత్రమైన పిలుపుగా వికసిస్తుందని, సాధారణ అడుగులను అసాధారణమైన విశ్వాస యాత్రగా మార్చేది దేవుని కృపేనని అందరికీ స్ఫూర్తినిస్తోంది.