Federation of Asian Bishops' Conferences (FABC) అధ్యక్షుడు కార్డినల్ ఫిలిప్ నెరి ఫెర్రావో, జూలై 22న జరిగిన FABC 12వ ప్లీనరీ సమావేశంలోని ప్రార్థన మరియు ఆత్మపరిశీలన భాగానికి నాయకత్వం వహించిన కార్డినల్ లూయిస్ ఆంటోనియో జి. టాగ్లేకు హృదయపూర్వక కృతజ్ఞతలు తెలిపారు.
హోటల్ ములియాలోని గెర్బెరా హాలులో ఒకరోజు ఆధ్యాత్మిక ధ్యాన కార్యక్రమం ముగింపుగా జరిగిన పవిత్ర దివ్యబలిపూజ అనంతరం మాట్లాడిన కార్డినల్ ఫెర్రావో, ఆధ్యాత్మిక ధ్యానానికి నాయకత్వం వహించేందుకు ఆహ్వానాన్ని స్వీకరించినందుకు మాత్రమే కాకుండా, ప్లీనరీ సమావేశం తొలి రోజులలో పీఠాధిపతులు, ప్రతినిధులతో ఒక సహోదరునిగా కలిసి ప్రయాణించినందుకు కూడా కార్డినల్ టాగ్లేకు ప్రత్యేకంగా కృతజ్ఞతలు తెలిపారు.
ఈ ఆధ్యాత్మిక ధ్యాన కార్యక్రమం, ప్లీనరీ సమావేశ కార్యక్రమాలకు ప్రతినిధులను ఆధ్యాత్మికంగా సిద్ధం చేసిందని ఆయన పేర్కొన్నారు.
"గత రెండు రోజులుగా కార్డినల్ టాగ్లే ఒక సహోదరునిగా మాతో కలిసి ఉన్నారు. ఈ ప్రార్థన మరియు ఆత్మపరిశీలన దినానికి నాయకత్వం వహిస్తూ, మనలను సరైన ఆధ్యాత్మిక మనోభావంలో నిలిపారు. అలాగే ప్లీనరీ సమావేశ ప్రయాణాన్ని కొనసాగించడానికి అవసరమైన సరైన దిశానిర్దేశాన్ని అందించారు," అని ఆయన అన్నారు.
ప్రసంగంలో ఒక సరదా సంఘటనను కూడా కార్డినల్ ఫెర్రావో పంచుకున్నారు. సెమినరీలో చదువుతున్న రోజుల్లో, కొత్తగా గురుత్వాభిషేకం పొందిన ఒక గురువు ఇచ్చిన తొలి ప్రసంగాన్ని "హృదయాలను కదిలించింది, మనసుకు ప్రశాంతతనిచ్చింది, సంతృప్తిని కలిగించింది" అని ప్రశంసించారని, కానీ తరువాత ఆ మాటల అసలు అర్థం సభికులు హాలు విడిచి వెళ్లిపోయారు, కొందరు నిద్రపోయారు, ఇకపై ఆయనను ప్రసంగానికి పిలవాల్సిన అవసరం లేదన్న సంతృప్తి పొందారని తెలిసిందని చెప్పడంతో సభలో నవ్వులు పూశాయి.
"ఆ మూడు విశేషణాలను నేను ఉపయోగించబోవడం లేదు," అని చిరునవ్వుతో చెప్పిన ఆయన, "అయితే కార్డినల్ టాగ్లేకు ఒక విషయం మాత్రం చెప్పాలనుకుంటున్నాను. మీ సందేశాలు మా హృదయాలను తాకాయి, మాకు ప్రేరణనిచ్చాయి, మాకు కొత్త వెలుగును ప్రసాదించాయి," అని అన్నారు.
ఆధ్యాత్మిక ధ్యాన కార్యక్రమం మొత్తం సందర్భంగా, ఆసియాలో సేవా కార్యానికి, ఐక్యతకు వారధులు కావాలనే సమావేశ ప్రధానాంశంపై ఆలోచిస్తూ, క్రీస్తుతో తమ అనుబంధాన్ని మరింతగా గాఢపరచుకోవాలని కార్డినల్ టాగ్లే ప్రతినిధులను ఆహ్వానించారు. ఆయన ధ్యాన ప్రసంగాలు సినడల్ పరివర్తన, సాధారణ ప్రజలలోను, దైనందిన జీవిత పరిస్థితులలోను దేవుని కార్యాన్ని గుర్తించడం, పక్షపాతం కాకుండా నిరీక్షణతో ఇతరులను చూడగల "యేసు నేత్రాలను" అలవరచుకోవడం వంటి అంశాలపై కేంద్రీకృతమయ్యాయి.
"యేసును కలుసుకోవడం, వ్యక్తిగతంగా ఆయన ప్రేమను అనుభవించడం ఎంత ముఖ్యమో మీరు మాకు బోధించారు," అని కార్డినల్ ఫెర్రావో అన్నారు. "సేవా కార్యానికి, ఐక్యతకు వారధులు, వారధుల నిర్మాణకర్తలుగా మారాలంటే, యేసు దృష్టిని అలవరచుకోవాలి. మన జీవితాల్లోను, శ్రీసభలోను, సమాజంలోను దేవుడు చేస్తున్న గొప్ప కార్యాలను గుర్తించగల సామర్థ్యాన్ని పెంపొందించుకోవాలి."
FABCతో కార్డినల్ టాగ్లేకు ఉన్న సుదీర్ఘ అనుబంధాన్ని కూడా FABC అధ్యక్షుడు ప్రత్యేకంగా ప్రస్తావించారు. ఈసారి జరిగిన సమావేశం కార్డినల్ టాగ్లేకు ఏడవ FABC ప్లీనరీ సమావేశమని ఆయన గుర్తుచేశారు.
"మీరు FABC కుటుంబంలో ఒక భాగం," అని కార్డినల్ ఫెర్రావో అన్నారు. "మీరు ప్రస్తుతం రోమ్లో సేవలందిస్తున్నందుకు మేము ఆనందిస్తున్నాము. మీ సవాళ్లతో కూడిన సేవలో మా సహోదర ఐక్యతను, నిరంతర ప్రార్థనల మద్దతును మీకు అందిస్తున్నామని హామీ ఇస్తున్నాము."
"మీరు పరిశుద్ధ పాపు గారికి సమీపంలో ఉన్నందున, మా కుమారసహజ విశ్వాస విధేయతను, మా హృదయపూర్వక ప్రార్థనల భరోసాను పరిశుద్ధ లియో పాపు గారికి తెలియజేయాలని మిమ్మల్ని కోరుతున్నాము," అని ఆయన అన్నారు.
ఈ సందర్భంగా, Symposium of Episcopal Conferences of Africa and Madagascar (SECAM) అధ్యక్షుడు కార్డినల్ ఫ్రిడోలిన్ బెసుంగు అంబోంగో, అలాగే Latin American and Caribbean Episcopal Council (CELAM) అధ్యక్షుడు కార్డినల్ జైమే స్పెంగ్లర్, సమావేశానికి సలహాదారులుగా హాజరైనందుకు కార్డినల్ ఫెర్రావో వారికి కూడా స్వాగతం పలుకుతూ కృతజ్ఞతలు తెలిపారు.
చివరగా, ఈ వేడుక అంతటా ప్రార్థనామయ వాతావరణాన్ని నెలకొల్పడంలో విశేషంగా సేవలందించిన ఆరాధనా కమిటీ సభ్యులు, కన్యస్త్రీలు, గురువులు, అలాగే ఇండోనేషియాలోని తూర్పు నుసా తెంగ్గారా ప్రావిన్స్, ఫ్లోరెస్ ద్వీపంలోని రుటెంగ్ మేత్రాసనానికి చెందిన ప్రిమా ఉంగ్గుల్ అనాథాశ్రమం బాలల గాయకబృందానికి ఆయన ప్రత్యేకంగా కృతజ్ఞతలు తెలిపారు.
