ప్రపంచ యువత దినోత్సవం Seoul 2027 యాత్రికులకు సురక్షితమైన, సుస్థిరమైన ఆధ్యాత్మిక అనుభవం కల్పిస్తాం: FABC ప్రతినిధులకు నిర్వాహకుల హామీ

ప్రపంచ యువత దినోత్సవం Seoul 2027 నిర్వాహకులు, ఆసియా నలుమూలల నుంచి వచ్చిన శ్రీసభ నాయకులకు ప్రపంచ యువజన మహాసమ్మేళనం ఏర్పాట్లు కేవలం నిర్వహణాపర అంశాలకే పరిమితం కాకుండా, యువ యాత్రికులకు సురక్షితమైన, ఆత్మీయ స్వాగతం పలికే, ఆధ్యాత్మికంగా సుసంపన్నమైన అనుభవాన్ని అందించడంపైనే ప్రధానంగా దృష్టి సారించామని హామీ ఇచ్చారు.

Federation of Asian Bishops' Conferences (FABC) 12వ ప్లీనరీ సమావేశం సందర్భంగా జూలై 23న రాత్రి భోజనం అనంతరం జకార్తాలోని హోటల్ ములియా వాండా హాల్లో నిర్వహించిన అవగాహన సమావేశంలో పీఠాధిపతులు, ప్రతినిధులకు సన్నాహకాలపై సమగ్ర వివరణ అందించడంతో పాటు, వసతి, రవాణా, రక్షణ విధానాలు (Safeguarding), ఇతర నిర్వహణాపర అంశాలపై ప్రశ్నలు అడిగే అవకాశాన్ని కల్పించారు.

ఈ సమావేశానికి ప్రపంచ యువత దినోత్సవం Seoul 2027 ప్రధాన సమన్వయకర్త, సియోల్ సహాయ పీఠాధిపతి పాల్ క్యుంగ్ సాంగ్ లీ నాయకత్వం వహించారు.
కార్యక్రమాన్ని పరిచయం చేస్తూ పీఠాధిపతి లీ, కొరియాలోని కతోలిక శ్రీసభ చరిత్రను స్మరించారు. హింసలు, యుద్ధాలు, శాంతి, ప్రజాస్వామ్యం వైపు సాగిన దీర్ఘ ప్రయాణం మధ్య కొరియా శ్రీసభ ఎలా రూపుదిద్దుకుందో ఆయన వివరించారు.

"కొరియాలోని శ్రీసభ సౌకర్యాల మధ్య కాదు, బాధల నేలపై పెరిగింది," అని ఆయన అన్నారు.

ఆ చరిత్రను ప్రస్తావిస్తూ, ప్రపంచ యువత దినోత్సవం Seoul 2027 కేవలం అంతర్జాతీయ యువజన సమావేశం మాత్రమే కాదని ఆయన పేర్కొన్నారు. చారిత్రక గాయాల మధ్య నుంచి నిరీక్షణ ఎలా పుడుతుందో, విపత్కర పరిస్థితుల్లో కూడా విశ్వాసం ఎలా వికసిస్తుందో యువత అనుభవించే అవకాశంగా ఈ మహాసమ్మేళనం నిలుస్తుందని తెలిపారు.
ప్రపంచ యువత దినోత్సవం Seoul 2027 2027 ఆగస్టు 3 నుంచి 8 వరకు జరుగుతుంది. దీనికి ముందు జూలై 29 నుంచి ఆగస్టు 2 వరకు సంప్రదాయ Days in the Dioceses కార్యక్రమం నిర్వహించబడుతుంది.

నమోదు ప్రక్రియను నిర్వాహకులు వివరించడంతో పాటు, సియోల్‌లోని విస్తృత ప్రజా రవాణా వ్యవస్థే యాత్రికుల ప్రధాన ప్రయాణ సౌకర్యంగా ఉపయోగించబడుతుందని తెలిపారు. ప్రతి యాత్రికుడికి నగరంలోని మెట్రో, బస్సు సేవలను కార్యక్రమం మొత్తం కాలం వినియోగించుకునేందుకు ప్రత్యేక రవాణా కార్డు అందజేయబడుతుందని వెల్లడించారు.

ఆరోగ్య సంరక్షణ, భద్రతా ఏర్పాట్లపై కూడా వారు వివరించారు. ఎనిమిది కతోలిక ఆసుపత్రుల సహకారం, 24 గంటల అత్యవసర వైద్య సేవలు, వీసా సౌకర్యాల కోసం దక్షిణ కొరియా ప్రభుత్వంతో సమన్వయం, ఒకసారి మాత్రమే ఉపయోగించే ప్లాస్టిక్ వినియోగాన్ని తగ్గించేందుకు పునర్వినియోగ నీటి సీసాలు, నీటి నింపే కేంద్రాల ఏర్పాటు వంటి పర్యావరణహిత చర్యలను కూడా వివరించారు.

ప్రశ్నోత్తర కార్యక్రమం సందర్భంగా సమావేశం మరింత చురుకుగా సాగింది. గత ప్రపంచ యువత దినోత్సవం అనుభవాలను ప్రతినిధులు పంచుకుంటూ, పలు నిర్వహణాపర అంశాలపై ప్రశ్నలు లేవనెత్తారు.

ఒక ప్రతినిధి మాట్లాడుతూ, ప్రపంచ యువత దినోత్సవం Lisbon సందర్భంగా యువ యాత్రికులు ఎదుర్కొన్న అతిపెద్ద సమస్య కార్యక్రమం కాదని, మొబైల్ ఫోన్లను ఛార్జ్ చేసుకునేందుకు తగిన కేంద్రాలు లేకపోవడమేనని గుర్తు చేశారు.
దీనికి స్పందించిన గురుశ్రీ లీ, ఈ అంశాన్ని నిర్వాహకులు ఇప్పటికే పరిగణనలోకి తీసుకున్నారని తెలిపారు.