సువార్త ప్రకటించే ముందు ‘నేలను సిద్ధం చేయండి’ – FABC ప్రతినిధులకు కార్డినల్ డేవిడ్ పిలుపు

"సువార్త ప్రచారం మాట్లాడటంతో కాదు, ఆలకించడంతో ప్రారంభమవుతుంది." ఇదే Federation of Asian Bishops' Conferences (FABC) ఉపాధ్యక్షుడు కార్డినల్ పాబ్లో వర్జిలియో డేవిడ్ జూలై 24న జకార్తాలో జరిగిన FABC 12వ ప్లీనరీ సమావేశం రోజువారీ పవిత్ర బలిపూజలో తన ప్రసంగం ద్వారా అందించిన ప్రధాన సందేశం.

వారం రోజుల సమావేశంలో పాల్గొన్న పీఠాధిపతులు, గురువులు, కన్యస్త్రీలు, సామాన్య విశ్వాసుల ప్రతినిధులను ఉద్దేశించి ప్రసంగించిన కార్డినల్ డేవిడ్, యిర్మియా గ్రంథంలోని పఠనం, విత్తువాని ఉపమానాన్ని ఆధారంగా చేసుకుని, సినడల్ పరివర్తన దృక్కోణంలో ఆసియాలోని శ్రీసభ తన మిషన్‌ను పునఃపరిశీలించాలని ఆహ్వానించారు.

దేవుని హృదయానుసారమైన కాపరుల గురించి యిర్మియా గ్రంథంలోని రూపకాన్ని ప్రస్తావిస్తూ, ఫిలిప్పీన్స్‌కు చెందిన ఈ కార్డినల్, శ్రీసభ వివేకవంతమైన విత్తువాని రూపాన్ని కూడా స్వీకరించాలని సూచించారు. ఫలవంతమైన సువార్త ప్రచారం విత్తనాలు చల్లడంతో కాదు, అంతకంటే ముందే ప్రారంభమవుతుందని అర్థం చేసుకునే వ్యక్తే నిజమైన విత్తువాడని ఆయన అన్నారు.

విత్తనం దేవుని వాక్యాన్ని, నేల వివిధ రకాల శ్రోతలను సూచిస్తుందనే సాధారణ వ్యాఖ్యానంపైనే దృష్టి పెట్టకుండా, ఆ నేల పరిస్థితిపైనే ఎక్కువ శ్రద్ధ పెట్టాలని కార్డినల్ డేవిడ్ ప్రతినిధులను కోరారు.

ఈ సందర్భంగా ఫిలిప్పీన్స్‌లోని ఒక చిన్న శ్రీసభ విశ్వాస సమాజం (Basic Ecclesial Community)లో జరిగిన బైబిల్ పంచుకునే సమావేశాన్ని ఆయన గుర్తు చేసుకున్నారు. అక్కడ ఒక వృద్ధ రైతు చెప్పిన మాట తనకు కొత్త అవగాహనను కలిగించిందని వివరించారు.

"ఆ రైతు ఎంతో గౌరవంగా నాతో మాట్లాడుతూ, విత్తువాని ఉపమానంలోని రైతు మంచి రైతు కాదన్నారు. ఎందుకంటే అతడు రహదారిపై, రాళ్ల మధ్య, ముళ్లపొదల్లో కూడా విత్తనాలు చల్లాడని చెప్పారు," అని కార్డినల్ డేవిడ్ అన్నారు.

ఆ మాట తనకు శ్రీసభ మిషనరీ సేవపై మరింత లోతైన అవగాహనను కలిగించిందని ఆయన తెలిపారు.

"మంచి రైతు నాటే ముందు చేయాల్సిన పనులే ఎక్కువని తెలుసుకుంటాడు. అతడు ముందుగా నేలను సిద్ధం చేస్తాడు."

నేటి ప్రపంచంలో సువార్త ప్రచారం సారాంశాన్ని ఈ రూపకం అద్భుతంగా తెలియజేస్తుందని కార్డినల్ డేవిడ్ పేర్కొన్నారు. సువార్తను ప్రకటించే ముందు, ప్రజల హృదయాలను దానిని స్వీకరించేందుకు సిద్ధం చేయడం శ్రీసభ తొలి బాధ్యత అని ఆయన చెప్పారు.

"నేలను సిద్ధం చేయడం అంటే మాట్లాడే ముందు ఆలకించడం, వాదించే ముందు సంభాషించడం, ఒప్పించే ముందు స్నేహాన్ని నిర్మించడం, నిబద్ధతను కోరే ముందు విశ్వాసాన్ని పెంపొందించడం," అని ఆయన వివరించారు.

ఈ విధానం ముఖ్యంగా ఆసియాలో అత్యంత అవసరమని కార్డినల్ డేవిడ్ అన్నారు. ఎందుకంటే శ్రీసభ అనేక మతాలు, సంస్కృతులు, జాతులతో కూడిన వైవిధ్యభరిత సమాజాల్లో సేవలందిస్తోంది. కొన్ని ప్రాంతాల్లో సువార్తను హృదయపూర్వకంగా స్వీకరిస్తుండగా, మరికొన్ని చోట్ల సందేహంతో, అపనమ్మకంతో చూస్తున్నారని ఆయన పేర్కొన్నారు.

అలాంటి పరిస్థితుల్లో, తన బోధ ఫలవంతం కావాలంటే ముందు తన ఉనికి, సేవల ద్వారా ప్రజల విశ్వాసాన్ని సంపాదించుకోవాలని శ్రీసభకు ఆయన సూచించారు.

దీనికి ఉదాహరణగా కార్డినల్ జార్జియో మరెంగో నాయకత్వంలోని మంగోలియా శ్రీసభను ఆయన ప్రస్తావించారు. అక్కడ శ్రీసభ ప్రధానంగా బోధన ద్వారా కాకుండా, విద్య, సేవా కార్యక్రమాలు, స్థానిక ప్రజలతో నిజమైన స్నేహబంధాల ద్వారా గుర్తింపు పొందిందని ఆయన వివరించారు.

ప్రేమ, కరుణతో కూడిన కార్యాలు సువార్తను ప్రత్యక్షంగా ప్రకటించే ముందే ప్రజల హృదయాలను సిద్ధం చేస్తాయని మంగోలియా అనుభవం మనకు తెలియజేస్తుందని ఆయన అన్నారు.

FABC ప్రోత్సహిస్తున్న సినడల్ పరివర్తన స్ఫూర్తి కూడా ఇదేనని కార్డినల్ డేవిడ్ వివరించారు. సినడాలిటీ అనేది కేవలం శ్రీసభలో కలిసి నడవడం మాత్రమే కాదు; గౌరవం, సంభాషణ, సేవల ద్వారా ప్రజలు క్రీస్తును అనుభవించే వేదికలను సృష్టించడం కూడా అని ఆయన చెప్పారు.

తన ప్రసంగం ముగింపులో, ఆసియాలో సువార్త ప్రచారం భవిష్యత్తు కేవలం సువార్త విత్తనాలను ఎంత విశ్వాసపూర్వకంగా చల్లుతున్నామన్నదానిపైనే కాకుండా, అవి మొలకెత్తే నేలను ఎంత ఓర్పుతో సిద్ధం చేస్తున్నామన్న దానిపైన కూడా ఆధారపడి ఉంటుందని ప్రతినిధులకు గుర్తు చేశారు.

"ఆసియాలో సువార్త ప్రచారం భవిష్యత్తు, మనం విత్తనాలను ఎంత విశ్వాసపూర్వకంగా చల్లుతున్నామనే దానిపైనే కాదు; అవి పెరిగే నేలను ఎంత ఓర్పుతో సిద్ధం చేస్తున్నామనే దానిపైన కూడా ఆధారపడి ఉంటుంది," అని ఆయన అన్నారు.

చివరగా, దేవుడు శ్రీసభ సేవకులను తన హృదయానుసారమైన కాపరులుగానే కాకుండా, విశ్వాసం, నిరీక్షణ, ప్రేమ అనే విత్తనాలు ఆసియా అంతటా సమృద్ధిగా ఫలించేలా నేలను ఓర్పుతో సిద్ధం చేసే వివేకవంతమైన విత్తువారిగా తీర్చిదిద్దాలని ప్రార్థిస్తూ ఆయన తన సందేశాన్ని ముగించారు.