సినడాలిటీ ప్రతి శ్రీసభలో జీవన విధానంగా మారాలి: FABC అధ్యక్షుడు కార్డినల్ ఫిలిప్ నేరి ఫెర్రావో

Federation of Asian Bishops' Conferences (FABC) అధ్యక్షుడు కార్డినల్ ఫిలిప్ నేరి ఫెర్రావో, సినడాలిటీ చర్చలకే పరిమితం కాకుండా ఆసియా అంతటా ప్రతి మేత్రాసనం, ప్రతి విచారణ, ప్రతి సంఘం, ప్రతి కుటుంబంలో జీవన విధానంగా మారాలని పిలుపునిచ్చారు. జూలై 21న జరిగిన FABC 12వ ప్లీనరీ సమావేశ ప్రారంభోత్సవంలో ఆయన కీలక ప్రసంగం చేశారు.

జకార్తాలో సమావేశమైన పీఠాధిపతులు, ప్రతినిధులను ఉద్దేశించి ప్రసంగించిన కార్డినల్ ఫెర్రావో, ఈ సమావేశం కేవలం ఒక పరిపాలనా సమావేశం కాదని, ఉమ్మడి వివేచనతో కూడిన ఒక ఆధ్యాత్మిక యాత్ర అని పేర్కొన్నారు.

"ఆసియాలోని శ్రీసభ భవిష్యత్తు గురించి చర్చించడానికే మనం ఇక్కడ సమావేశం కాలేదు. దేవుడు తన ప్రజల కోసం కోరుకుంటున్న చిత్తాన్ని కలిసి తెలుసుకోవడానికే మనమంతా ఒకచోట చేరాము," అని ఆయన అన్నారు.

"సినడల్ పరివర్తనకు పిలువబడి, ఆసియాలో వారధులు మరియు వారధుల నిర్మాణకర్తలుగా ఉండే సేవ" అనే సమావేశ ఇతివృత్తంపైనే ఆయన సందేశం కేంద్రీకృతమైంది. సినడాలిటీపై సినడ్ స్ఫూర్తితో ఆలకించడం, భాగస్వామ్యం, ఉమ్మడి వివేచన అనే సంస్కృతిని పెంపొందించాలనే శ్రీసభ నిబద్ధతకు ఈ ఇతివృత్తం ప్రతిబింబమని ఆయన తెలిపారు.

కార్డినల్ ఫెర్రావో అభిప్రాయం ప్రకారం, సినడాలిటీ అనేది మరో పాస్టరల్ కార్యక్రమం కాదు; పరిపాలనా సంస్కరణ కూడా కాదు.

"మన ముందున్న అసలు ప్రశ్న సినడాలిటీ ముఖ్యమా కాదా అనేది కాదు. అది మన మేత్రాసనాల్లో, విచారణలలో, సంస్థల్లో, సంఘాల్లో, కుటుంబాల్లో మరింత లోతుగా ఎలా వేళ్లూనుకోవాలన్నదే అసలు ప్రశ్న," అని ఆయన అన్నారు.

తన ప్రసంగమంతటా శ్రీసభ సేవ సమాగమంతోనే ప్రారంభమవుతుందని కార్డినల్ ఫెర్రావో నొక్కిచెప్పారు. "వచ్చి చూడండి" అని నతానియేలును ఆహ్వానించిన ఫిలిప్పు సువార్త సంఘటనను స్మరించుకుంటూ, సువార్త ప్రకటన వాదనల్లో గెలవడంలో కాకుండా, ప్రజలను యేసుక్రీస్తుతో సాక్షాత్కార అనుభవానికి ఆహ్వానించడంలోనే ఉందని వివరించారు.

అదే స్ఫూర్తి ఈ ప్లీనరీ సమావేశాన్ని కూడా నడిపించాలని ఆయన అన్నారు. ఆసియా నలుమూలల నుంచి వచ్చిన పీఠాధిపతులు ప్రార్థించడానికి, పరస్పరం ఆలకించడానికి, వివేచన చేయడానికి, తమ స్థానిక శ్రీసభల పాస్టరల్ వాస్తవికతలను పంచుకోవడానికి ఇక్కడ సమావేశమయ్యారని పేర్కొన్నారు.

"ఇవి కేవలం కార్యక్రమ పట్టికలోని అంశాలు మాత్రమే కావు," అని పేర్కొంటూ, ప్రార్థన, సంభాషణ, ఉమ్మడి వివేచనలే నిజమైన సినడాలిటీ వ్యక్తీకరణలని ఆయన వివరించారు.

ప్రాచీన నాగరికతలు, విభిన్న సంస్కృతులు, ప్రధాన మత సంప్రదాయాలతో నిండిన ఆసియా ఖండంలో శ్రీసభ నిర్వహించాల్సిన సేవపై కూడా కార్డినల్ ఫెర్రావో ఆలోచనలు పంచుకున్నారు. ఈ వాస్తవికతలు శ్రీసభకు అవకాశాలను మరియు సవాళ్లను కూడా అందిస్తున్నాయని ఆయన అన్నారు.

"ఆసియాలోని శ్రీసభ వారధిగా ఉండటానికీ, వారధుల నిర్మాణకర్తగా మారటానికీ పిలువబడింది," అని పేర్కొంటూ, సంస్కృతులు, మతాల మధ్య మరింత సంభాషణ, సామరస్యం, ఐక్యతను పెంపొందించాలని ఆయన ప్రోత్సహించారు.

కృత్రిమ మేధస్సు, వలసలు, పర్యావరణ క్షీణత, అసమానతలు, సాయుధ ఘర్షణలు వంటి పరిణామాలు ఆసియా ఖండాన్ని వేగంగా మార్చుతున్నాయని ఆయన గుర్తుచేశారు. అయితే ఇవి క్రైస్తవ నిరీక్షణను తగ్గించేవి కావని, సంఘీభావం, కరుణ, పునరుద్ధరించబడిన సువార్త సేవ ద్వారా శ్రీసభ మరింత విశ్వసనీయమైన సాక్ష్యాన్ని అందించాల్సిన అవసరాన్ని సూచిస్తున్నాయని అన్నారు.

వారంరోజుల పాటు కొనసాగే ఈ ప్లీనరీ సమావేశమంతా పరిశుద్ధాత్మ మార్గదర్శకత్వానికి అంకితం చేయాలని కార్డినల్ ఫెర్రావో ప్రతినిధులను కోరారు.

సమావేశం చివరలో రూపొందే పత్రం చర్చల సారాంశంగా మాత్రమే కాకుండా, ఆసియాలోని స్థానిక శ్రీసభలు సినడాలిటీని జీవన అనుభవంగా ఆచరించేందుకు ఆచరణాత్మక మార్గదర్శకంగా నిలవాలని ఆయన ఆకాంక్షించారు.

నివేదికలు సమర్పించే ముందు, చర్చలు ప్రారంభించే ముందు, తీర్మానాలు ఆమోదించే ముందు, ఈరోజు ఆసియాలోని శ్రీసభను దేవుడు ఏ దిశగా పిలుస్తున్నాడో కలిసి వివేచించడం ఈ సమావేశం యొక్క ప్రధాన బాధ్యత అని ఆయన అన్నారు.

తన ప్రసంగాన్ని ముగిస్తూ, FABC 12వ ప్లీనరీ సమావేశ విజయాన్ని అది రూపొందించే పత్రం ఆధారంగా కాకుండా, జకార్తా నుంచి తిరిగి వెళ్లే ప్రతి ప్రతినిధి పరిశుద్ధాత్మ స్వరాన్ని మరింత శ్రద్ధగా ఆలకించే వ్యక్తిగా, పరస్పర నిబద్ధతతో జీవించే శ్రీసభ సభ్యుడిగా, ఆసియా అంతటా వారధుల నిర్మాణకర్తగా సేవ చేయడానికి మరింత సిద్ధపడిన వ్యక్తిగా మారాడా లేదా అన్న దాని ఆధారంగానే కొలవాలని కార్డినల్ ఫిలిప్ నేరి ఫెర్రావో పేర్కొన్నారు.