నేడు బంగాళాఖాతంలో అల్పపీడనం ఏర్పడే అవకాశం.. భారీ వర్షాలు

నేడు బంగాళాఖాతంలో అల్పపీడనం ఏర్పడే అవకాశం.. భారీ వర్షాలు

నైరుతి రుతుపవనాలు చురుకుగా ఉన్నట్టు వాతావరణ శాఖ వెల్లడించింది. దీని ప్రభావంతో పలు ప్రాంతాల్లో వర్షాలు కురుస్తున్నట్టు తెలిపింది. దీనికి తోడు బంగాళాఖాతంలో శుక్రవారం నాటికి అల్పపీడనం ఏర్పడే అవకాశం ఉన్నట్టు హైదరాబాద్ వాతావరణ శాఖ వెల్లడించింది. ప్రస్తుతం పశ్చిమ్ బెంగాల్‌ ఉత్తర భాగం, దాని పరిసర ప్రాంతంలో 7.6 కి.మీ. ఎత్తువరకు ఉపరితల ఆవర్తనం కొనసాగుతోందని పేర్కొంది. దీని ప్రభావంతో పశ్చిమ్ బెంగాల్‌లోని కోస్తాతీర ప్రాంతంలో శుక్రవారం నాటికి అల్పపీడనం ఏర్పడే అవకాశం ఉందని తెలిపింది. దీని ప్రభావంతో తెలంగాణ, ఏపీలోని కోస్తాంధ్ర, రాయలసీమల్లో తేలికపాటి నుంచి ఓ మోస్తరు వర్షాలు కురిసే అవకాశం ఉందని అధికారులు తెలిపారు.

కాగా, గతంలో ఎన్నడూ లేనివిధంగా తెలుగు రాష్ట్రాల్లో తీవ్ర వర్షాభావ పరిస్థితులు నెలకున్నాయి. లోటు వర్షపాతంతో సాగు విస్తీర్ణం గణనీయంగా పడిపోయింది. ఈ ఏడాది నైరుతి రుతుపవనాలు ఆలస్యంగా ప్రవేశించడంతో తీవ్ర ప్రభావం చూపుతోంది. దేశవ్యాప్తంగా నైరుతి రుతుపవనాల ప్రభావంతో విస్తారంగా వర్షాలు కురుస్తున్నా తెలుగు రాష్ట్రాల్లో మాత్రం పరిస్థితి భిన్నంగా ఉంది. ఈ ఏడాది సాధారణ వర్షాలు కురుస్తాయని వాతావరణ శాఖ చెప్పిన ముందస్తు అంచనాలు తలకిందులయ్యాయి. జూన్‌లో సాధారణం కంటే 33 శాతం, జులైలో 40 శాతం లోటు వర్షపాతం నమోదయ్యింది. మరోవైపు, కృష్ణా బేసిన్ ఎగువ ప్రాంతాల్లో జలాశయాలు నిండితేగానీ తెలుగు రాష్ట్రాలకు నీరు వచ్చే అవకాశం లేదు. ఆల్మట్టి, నారాయణ‌పూర్ జలాశయాలు పూర్తిగా నిండకపోవడంతో శ్రీశైలంలోకి ఇంకా ప్రవాహం మొదలుకాలేదు.

కోస్తాలో ఉష్ణోగ్రతలు వేసవిని తలపిస్తున్నాయి. పగటి ఉష్ణోగ్రతలు సాధారణం కంటే మూడు నాలుగు డిగ్రీలు అధికంగా నమోదవుతున్నాయి. ఇక, అస్సాం, మేఘాలయలో అతిభారీ వర్షాలు కురుస్తాయని వాతావరణ శాఖ వెల్లడించింది. దేశవ్యాప్తంగా ఇప్పటి వరకు 35 శాతం లోటు వర్షపాతం ఉన్నట్టు ఐఎండీ వెల్లడించింది. వచ్చే వారం రోజుల్లో మధ్య భారతంలో వర్షాలు పుష్కలంగా కురుస్తాయని పేర్కొంది.

Add new comment

4 + 1 =

Please wait while the page is loading